Në mbledhjen e sotme të Komisionit parlamentar të Sigurisë tema e diskutimit ka qenë pajisja përgjuese. Kjo pajisje e markës “IMSI Catcher” dyshohet se është futur ilegalisht në Shqipëri.
Gjatë kësaj seance është arritur të miratohet kërkesa për të thirrur në një seancë dëgjimore ministrin e Brendshëm Saimir Tahiri, kryeprokurprin Adriatik Llalla, kreun e SHISH Visho Ajazi dhe kryepolicin Haki Çako, për pajisjen që siç akuzon opozita, gjendet në Policinë e Shtetit.
Nënkryetari demokrat Flamur Noka, i cili drejton dhe komisionin, tha se pajisja në fjalë kushton 800 mijë euro dhe mund të përgjojë bisedat edhe nëse telefoni është i fikur. Sipas tij, zyrtarët duhet të japin sqarime se si kjo pajisje ka hyrë në vendin tonë.
“Jemi të shqetësuar për cenimin e sigurisë kombëtare. Presidenti ngriti shqetësimin, kërkoi hetim”, tha Noka.
Deputetët e Lëvizjes Socialiste për Integrim kanë të njëjtin qëndrim si demokratët për mbajtjen e një seancë dëgjimore me zyrtarët e sipërpërmendur. Luan Rama kërkoi që të hetohet dhe të respektohet ligji, pasi sipas tij ka mospërputhje mes deklaratave të ministrit Tahiri dhe Presidentit. Po ashtu ai ka thënë se implikimi i Interforcës në këtë çështje do të ishte një shkelje e rëndë.
“Ministria e Brendshme e Policia duhet të respektojnë kuadrin ligjor. Ka mosperputhje mes deklaratave te ministrit dhe presidentit. Deri kur të ketë qëndrim të prokurorisë prezumohet pafajësia. Këtë e ndan hetimi i pavarur i prokurorisë. Jam shprehur dakord për seancën dëgjimore. Më parë të vijë kreu i Shërbimit Informativ Shtetëror. Implikimi i interforcës do të ishte një shkelje ligjore e rëndë nëse ka ndodhur. Por nuk besoj se ka ndodhur kjo gjë. T’i shkojmë deri në fund të vërtetës”, tha Luan Rama.
Seanca dëgjimore me zyrtarët do të mbahet gjatë ditës së nesërme.
Nënkryetari i komisionit, Flamur Noka, u shpreh se gjatë intervistës së tij në “Top Story” për pajisjen e përgjimit, Tahiri dha dy versione.
Noka bëri të ditur se Partia Demokratike ka informacione se pajisja kushton 800 mijë euro dhe përgjon edhe kur telefoni është i fikur.
