Një tjetër video është publikuar e atentatorit të Elton Çiços, në të cilën duket fytyra e tij.
ABC news ka nxjerrë këtë video të kamerave të sigurisë së lokalit ku duket autori ende i paidentifikuar që nga momenti që hyn në lokal. Ai është një person me trup mbi mesataren, ndoshta pak më i mbushur. Disa ekspertë të kriminalistikës thonë se këtë ide e japin edhe rrobat e tepërta që ka veshur sipër të cilat i ka hequr pasi është larguar nga vendi i krimit. Personi në fjalë mban atlete dhe një kapele të bardhë me strehën e ulur mbi sy. Nga pamjet e kësaj videoje të re duket që ka flokë të zinj dhe mban pak mjekër. Në brez ka një çantë nga ato që mbajnë zakonisht kamarierët ndërsa armën tip pistoletë e ka nxjerrë nga përpara. Nga video duket që autori ka edhe një armë nga pas që ndoshta do ta përdorte në rast të bllokimit të së parës. Pasi ka qëlluar mbi viktimën është larguar menjëherë nga lokali me vrap.
