TIRANE- Prej disa ditësh në Spitalin Universitar të Traumës nuk ka antibiotikë. Në fakt, mungesat janë të të gjitha llojeve, por mjekët shpjegojnë se antibiotikët janë nga më të nevojshmet në spital. Mjekët të cilët theksuan se po detyrojnë familjarët e pacientëve t’i blejnë vetë këto ilaçe, ndërkohë që për shkak të kësaj situate, në disa raste ka pasur edhe konfrontime.“Kemi filluar të lëshojmë receta për t’i blerë antibiotikët nëpër farmacitë jashtë spitalit. Nuk kemi zgjidhje tjetër. Patjetër, që kjo situatë është pasuar edhe me përplasje mes familjarëve dhe kryesisht infermierëve, që janë në kontakt më të vazhdueshëm me ta, pasi akuzojnë spitalin për mungesat e krijuara”, u shprehën mjekët.
Një tjetër denoncim vjen edhe për medikamentet që përdoren për të bërë anestezinë. Sipas mjekëve ato janë drejt përfundimit, çka do të thotë se janë në ‘rrezik’ ndërhyrjet kirurgjikale. “Ne kemi vetëm për pak ditë ilaçe si Prozerina, që përdoren nga anestezistët për ndërhyrjet kirurgjikale. Sigurisht që pa to është e pamundur të kryhen operacionet”, u shprehën mjekët.
Përfaqësues të Ministrisë së Shëndetësisë thanë se mungesat për antibiotikë janë krijuar si pasojë e vonesës së nënshkrimit të kontratave, pas procedurës së prokurimit të ilaçeve. “Shkak i mungesës së këtyre ilaçeve është bërë nënshkrimi i kontratave, por besojmë se brenda pak ditësh do të bëhet furnizimi i plotë”, u shprehën përfaqësues të Ministrisë së Shëndetësisë.
