Në hetimet e prokurorisë për verifikimin e pronave dhe pasurisë së Emiljano Shullazit, nga një tjetër pistë del se ky i fundit nuk ka patur asnjë numër telefoni.
Kjo është konfirmuar nga kompanitë e telefonisë lëvizëse ku në to Emiljano nuk ka patur asnjë numër në emrin e tij. Nga kjo ka dalë që Shullazi ka përdorur celularët e personave të tjerë që mbante afër.
Kompanitë e telefonisë lëvizëse kanë njoftuar policinë dhe prokurorinë se në emër të Emiljano Shullazit nuk ka numër të regjistruar pranë tyre. Përgjigja e kompanive, ka bërë që hetuesit të krijojnë bindjen se Shullazi ishte shumë i kujdesshëm me përdorimin e telefonave.
Ndërsa, Dani dhe kushuriri i tij Blerimi kanë edhe më shumë biseda të përgjuara, por që janë treguar të kujdesshëm në komunikim. Nga ana tjetër, burimet thonë se po grupi hetimor po verifikon numrat e personave të tjerë që rrinin në krah të Shullazit apo familjarëve të tyre.
Sipas prokurorisë, në shumicën e rasteve pjesëtarët e këtij grupi kriminal, përdornin telefonat vetëm për të lënë takime me personat e tjerë. Ku në shumicën e bisedave, personat e përgjuar flisnin në emër të Emiljano Shullazit, i arrestuar për disa akuza, mes tyre gjobëvënien ndaj shumë biznesmenëve në Tiranë.
Burimet thonë se grupi hetimor i kryesuar nga dy prokurorët Elizabeta Imeraj dhe Ened Nakuçi, kanë deleguar një sërë detyrash tek oficerët e policisë gjyqësore për të kryer disa veprime hetimore për dosjen.
Në mesin e tyre janë edhe evidentimi nga Hipoteka e të gjitha pronave dhe pasurisë së Emiljano Shullazit dhe personave të tjerë të dyshuar, për përfshirjen e tyre në veprimtari kriminale. Si dhe, është kërkuar nga bankat e nivelit të dytë në vend të identifikojnë llogarit bankare në emër të Emiljano Shullazit dhe pjesëtarëve të afërt të familjes së tij.
Veprim ky, i marrë nga grupi hetimor pasi dyshohet se Shullazi ka përfituar shuma të mëdha parash nga aktiviteti kriminal i gjobëvënies ndaj biznesmenëve të ndryshëm në vend.
