Teksa kanë mbetur rreth 1 vit nga zgjedhjet parlamentare, qeveria ka nisur fushatën e premtimeve për të mbuluar pakënaqësitë e mëdha në radhët e biznesit.
Për këtë, Ministri i Financave Arben Ahmetaj u ka dërguar një letër rreth 10 dhomave të biznesit në vend, duke i ftuar që të paraqesin propozimet e tyre për lehtësitë administrative.
Ahmetaj ka ripërsëritur se vitin e ardhshëm, pra në 2017, nuk do të ketë rritje taksash, por lehtësim procedurash për të krijuar një klimë më të mirë për biznesin
Ai shton se pranë Ministrisë së Financave është ngritur një grup teknik për thjeshtimin e procedurave tatimore doganore.
“Me bindjen që informaliteti është një sfidë e përbashkët e qeverisë dhe sipërmarrjes dhe me synimin për të rritur pajtueshmërinë e biznesit dhe forcimin e kulturës së pagimit të taksave përmes vetëkorrigjimit të përgjegjësisë tatimore, jeni të lutur të na ndihmoni me ide, sugjerime dhe rekomandime konkrete në kuadër të thjeshtimit të procedurave dhe lehtësimit të kushteve të të bëri biznes në vend”, thuhet në letrën e kreut të Financave.
Ministri thekson në letër se propozimet duhet të dërgohen brenda datës 20 qershor të vitit 2016 pranë kësaj Ministrie.
Por pavarësisht kësaj, premtimi i Ahmetajt shihet si një lëvizje farse. Kjo pasi qeveria e cila deri tani dështoi për të krijuar një klimë miqësore me biznesin, tenton që t’i manipuloj me lehtësira proceduriale në vitin zgjedhor 2017.
