Ish-kreu i policisë Bashkiake dhe Inspektoriatit Ndërtimor Urbanistik Vendor të Tiranës, Florenc Hoxha u dënua nga gjykata e Tiranës me 1 vit burg, pasi prokuroria e akuzoi për “Shpërdorim detyre”.
Hoxha u denoncua nga një familje në kryeqytet për një ndërtim në vitin 2012. Familja pretendon se po iu merrej prona në rrugën “Reshit Petrela” duke u bërë një ndërtim pa leje.
Ndërtimi pa leje përfundoi në një karburant i cili dy vite më pas do të prishej nga Inspektorati Ndërtimor Kombëtar si një objekt pa leje.
Përveç ankesave të familjes në fjalë, sipas prokurorisë Florenc Hoxha me veprimet e mos veprimet e tij ka lejuar ndërtimin e objektit pa leje edhe pse ligji i jepte të drejtë ta prishte dhe të kallëzonte ndërtuesin abuziv.
Ndërkohë dënimi i dytë me 4 muaj i konvertuar në lirim me kusht që rëndon ndaj Hoxhës është ai i përfshirjes në një konflikt në 2 shkurt 2015, ku sipas gjykatës fjalori i përdorur ka cenuar figurën e funksionarit publik që Hoxha mbante prej disa vitesh.
VENDIMI i GJYKATËS
Deklarimin fajtor te pandehurit Florenc Hoxha, për veprën penale te “Shperdorimit te detyres”, të parashikuar nga neni 248 i K.Penal dhe dënimin e tij me 1 (nje) vit burgim. – Vuajtja e denimit per te pandehurin fillon nga dita ekzekutimit vendimit, duke urdheruar qe kjo vuajtje te kryhet ne nje nga Burgjet e Sigurise Zakonshme. – Shpenzimet proceduriale dhe ato gjyqesore i ngarkohen te pandehurit. – Kundra vendimit lejohet ankim ne Gjykaten e Apelit Tirane brenda 10 diteve nga e nesermja e shpalljes. U shpall ne Tirane, sot me date 18/03/2016
