Kuvendi i Shqipërisë ka akorduar një fond prej 13 milionë lekësh të vjetra për blerjen e një aparati fotografik. Më 5 prill, Kuvendi ka shpallur dokumentet e tenderit në Agjencinë e Prokurimit Publik, ndërsa vlerësimi i ofertave do të bëhet më 19 prill, në orën 14:00.
Boldnews ka siguruar këto dokumente, ku janë të detajuara fondi i lartë i Kuvendit, apo edhe specifikimet për setin e aparatit fotografik.
“Kuvendi i Shqipërisë ka hapur procedurën e prokurimit elektronik për ‘blerje set aparati fotografik’. Fondi limit në total është 1.311.072 lekë pa TVSH. Burimi i financimit është buxheti i shtetit, ndërsa afati për dorëzimin e mallit nga nënshkrimi i kontratës duhet të bëhet brenda 30 ditëve” thuhet në këtë dokument.
Sipas tij, afati i fundit për dorëzimin e ofertave do të jetë 19 prilli, ndërsa në po të njëjtën datë do të bëhet edhe zhvillimi i tenderit. Titullari i autoritetit kontraktor, është Albana Shtylla.
Ndërkohë, Boldnews ka mësuar edhe specifikimet sesi duhet të jetë aparati fotografik që do ti kushtojë taksapaguesve shqiptarë plot 13 milionë lekë të vjetra.
“Aparati fotografik dixhital duhet të jetë detyrimisht i serisë profesionale i kompanisë prodhuese. Aparati duhet të ketë fokusim dhe ekspozim automatik. Të ketë sensor CMOS dhe të jetë mbi 21.87 megapixel. Aparati duhet të ketë funksionin për pastrimin nga ‘pluhuri’ që mund të kenë fotografitë. Aparati duhet të jetë i aftë të kapi pamje me rezolucion 5750×3800.
Sistemi i kontrollit të pamjes ose ekuivalent me të duhet të ketë minimumi disa opsione: Standard, neutral, monochrome, portrait dhe landscape” thuhet në dokumentet që zotëron Boldnews. Sipas tyre, pajisja duhet të ofrojë tipe të ndryshme parametrash të paracaktuar për balancimin e të bardhës. Aparati duhet të ketë minimumi 7 tipe të paracaktuar pa përfshirë balancimin automatik dhe duhet të ofrojë me patjetër korrigjim të balancës së bardhë.
Pajisja, thuhet në dokumente, duhet të kryejë reduktimin e zhurmave, rregullimin e problemeve që rrjedhin nga lentet si rregullimin e ndriçimit nëpër skaje, rregullimin e ngjyrave etj. Më tej është përcaktuar se pajisja duhet të ofrojë minimumi 60 pika fokusimi, 60 mënyra matje për kontrollin e ndriçimit të pamjes dhe ndriçim të shumëfishtë. Aparati duhet të mundësojë ruajtjen e të dhënave në karta memorie me kapacitet 32 GB ose më të madh.
FORMULAR I NJOFTIMIT TE KONTRATES 2016
(Boldnews)
