Në një kohë kur kriza ekonomike ka mbërthyer vendin, institucionet shtetërore bëjnë tenderë për bileta avioni. Udhëtimet jashtë vendit janë konsideruar një luks i tepruar, ndërkohë kjo “modë” vazhdon të jetë prezente.
Institucionet janë vënë në “garë” se kush shpenzon më shumë për bileta avioni. Nga vëzhgimi i Bold News rezulton se Bashkia e Tiranës ka shpenzuar më shumë se ministria e Arsimit dhe e Kulturës. Pra, Erion Veliaj ka “mundur” dy ministret e kabinetit “Rama” Lindita Nikollën dhe Mirela Kumbaron. Ndërkohë, Mimi Kodheli vazhdon te jetë në “top listë”.
Sipas dokumenteve zyrtare, Kodheli ka shpenzuar gati 730 milionë lekë të vjetra, të detajuar për dy vite buxhetore 2016 dhe 2017. Nikolla ka akorduar 91 milionë lekë të vjetra me prokurimin për “bileta të transportit ajror ndërkombëtar, për vitet 2016-2017”. Ndërkohë, Kumbaro, sipas dokumenteve, ka shpenzuar 78 milionë lekë të vjetra.
Vëzhgimi i Bold News ka vijuar në Agjencinë e Prokurimit Publik (APP), ku rezulton se Bashkia e Tiranës, vetëm për 8 muaj, do të shpenzojë plot 117 milionë lekë të vjetra për bileta avioni.
Sipas dokumentit zyrtar në APP, Bashkia e Tiranës është autoriteti kontraktor në prokurimin me procedurë të hapur për “blerje bilete udhëtimi për transport ajror ndërkombëtar për Bashkinë e Tiranës për vitin 2016”. “Fondi limit është 11.700.000 lekë lekë pa TVSH. Burimi i financimit janë të ardhurat e vetë bashkisë. Afati për realizimin e shërbimit do të jetë nga data e nënshkrimit të marrëveshjes kuadër deri në datë 31.12.2016” thuhet në këto dokumente.
Gjatë këtij viti, bashkia ka bërë disa prokurime të vogla në Agjencinë e Prokurimit Publik. Në janar, bashkia bëri një njoftim në APP, ku akordoi një fond limit 201.200 lekë për “blerje shërbimi për biletë udhëtimi vajtje- ardhje me avion në Bruksel për datat 25.01.2016 (vajtje) dhe 26.01.2016 (kthim)”.
Më 8 shkurt u akorduan 57.845 lekë për “blerje shërbimi për biletë udhëtimi vajtje- ardhje me avion në linjën Tiranë- Londër për datën 19.02.2016 (vajtje) dhe Londër- Tiranë për datën 23.02.2016 (kthim).
Më 9 shkurt është bërë prokurim i drejtpërdrejtë me vlerë të vogël me fond limit 40.000 lekë pa TVSH për biletë udhëtimi vajtje-ardhje me avion Tiranë-Torino për datat 11.02.2016 (vajtje) dhe 12.02.2016 (kthim).
