“Panama Papers” mund të jetë subjekt i hetimit nga ana e autoriteteve shqiptare, nëse sigurohen të dhëna të mjaftueshme për përfshirjen e kompanive që veprojnë në Shqipëri në skandalin më të madh financiar botëror.
Të kontaktuar nga “Boldnews.al”, burime zyrtare të Prokurorisë së Përgjithshme në Tiranë u shprehën se “po bashkëpunohet me institucionet e tjera ligjzbatuese për të qartësuar situatën mbi përfshirjen e mundshme në çështjen “Panama Papers” të kompanive apo shtetasve shqiptarë e të huaj që ushtrojnë veprimtari tregtare në territorin e Republikës së Shqipërisë”.
Ky është reagimi i parë zyrtar i autoriteteve shqiptare për aferën që ka tronditur financat botërore, pasi një grup gazetarësh zbuluan miliona dokumenta që lidhin kompani dhe njerëz të fuqishëm në botë me mashtrimet nëpërmjet “parajsave fiskale”.
Sipas informacioneve të deritanishme, mendohet që disa kompani shqiptare dhe disa individë janë përfitues nga lëvizjet e dyshimta financiare nëpërmjet firmës ligjore “Mossack Fonseca”, të regjistruar në Panama.
Deri më tani, referuar një gazete izraelite, një prej kompanive që operojnë në Shqipëri dhe që lidhet me skandalin e Panamasë është një subjekt tregtar që ushtron aktivitetin në fushën e hidrokarbureve. Nga ana e autoriteteve shqiptare ende nuk ka një version zyrtar nëse konfirmojnë ose jo informacionin e shpërndarë nga media e Tel Avivit.
Megjithatë, fakti që institucionet shqiptare po angazhohen në këtë drejtim, duhet pritur për t’u zhvilluar hetimet e mundshme dhe më pas rezultatet konkrete.
Ndërkohë, burime të “Boldnews.al” konfirmojnë se ka një angazhim edhe të Drejtorisë së Parandalimit të Pastrimit të Parave dhe Sektorit Kundër Krimit Ekonomik në Policinë e Shtetit.
Në bazë të të dhënave të deritanishme të publikuara lidhur me skandalin “Panama Papers”, Shqipëria duket se është shumë larg në problematikë, krahasuar me shumë vende të tjera, përfshirë edhe shtetet gjigandë ekonomik.
