Kryetari i Partisë Socialiste të Tiranës njëherësh Ministër i Punëve të Brendshme Saimir Tahiri ka kërkuar pjesëmarrjen e të gjithë anëtarëve të Partisë Socialiste, qofshin këta të vjetër apo të rinj në referendumin e datës 9 prill. Ministri Tahiri tha se nuk ka shumë rëndësi se cili do të jetë rezultati i referendumit por e rëndësishme është që t’i japim çdo anëtari mundësinë që të kuptojë dimensionin demokratik të Partisë Socialiste.
“Në një referendum secili mund të thotë fjalën e tij. Në një referendum ku secili vendos me vote për çështje madhore për mënyrën sesi bashkëjetojmë ne në Partinë Socialiste. Nuk ka shumë rëndësi rezultati i referendumit. E rëndësishme është që çdo anëtar të marrë pjesë.
Ka më shumë rëndësi që ne ti japim mundësi çdo anëtari dhe anëtareje të flasë me zërin e tij dhe votën e vet, në datë 9 në referendum. Për të na dhënë ne mundësi të kuptojmë se cili është dimensioni demokratik që duam brenda PS, si ta bëjmë me demokratike dhe pjesëmarrëse PS dhe si ta bëjmë të mundur që çdo anëtar të thotë fjalën e vet për gjëra dhe vendime madhore por jo vetëm në jetën e përditshme politike, por mbi të gjitha në jetën e përditshme të qytetarëve.”-tha ministri Tahiri.
Ndërkohë ministri Tahiri rikujtoi dhe njëherë ftesën e Kryeministrit Rama për opozitën për tu ulur dhe dialoguar lidhur me reformën në drejtësi, të cilën ai e konsideroi si më të rëndësishmen nga të gjitha.
“Opozita ka në tavolinë ftesën e Kryeministrit. Por opozita zgjedh sherrin në vend të dialogut, dhunën, bllokimin, përplasjet pistoletat në vend të tryezës së bashkëbisedimit. Ne kemi vetëm një alternativë, t’i tregojmë opozitës se ka gjithmonë mundësi për dialog. Nuk po i kërkojmë opozitës të heqë dorë nga kritikat për qeverinë, por ka gjëra ku nuk mund të ndahemi dot, sepse shqiptarët janë bashkë, pavarësisht partive.
E tillë është edhe reforma në drejtësi mbi gjithë të tjerat e për këtë opozita e ka të hapur derën e dialogut.”- theksoi ministri Tahiri ndër të tjera.
