Nëpërmjet falsifikimit të dokumentave, Albana Zeqaj vodhi duke falsifikuar firmat e disa klientëve të “Tirana Bank” rreth 32 milion lekë. Kanë qënë dy klientë të cilët kanë rënë pre e falsifikimeve të vazhdueshme të zv.Drejtoreshës së kësaj banke, skemë kjo që kishte nisur nga viti 2010 deri në 2014. Gjykata nuk e dënoi me burgim por vetëm me 18 muaj Shërbim Prove.
Një nga degët e bankës së nivelit të dytë në Shqipëri, “Tirana Bank” ka rënë pre e një vjedhjeje nga vetë punonjësit e saj. Albana Zeqaj, në pozicionin e zv. Drejtoreshës në “Tirana Bank”, në degën e ish Kinostudios për më shumë se 4 vite ka falsifikuar dokumentat dhe firmat e klientëve.
Sipas vendimit të Gjykatës së Rrethit Gjyqësor Tiranë, nëpërmjet këtyre veprimeve të paligjshme, Zeqaj ka arritur të përvetësoj rreth 32 milion lekë nga kjo bankë, para këto të marra nga llogaritë e klientëve të “Tirana Bank”.(Shkarko vendimin)
Nga raporti i Kontrollit të Brendshëm i “Tirana Bank”, rezulon se zv. Drejtoresha u ka ngarkuar kredi dy klientëve, përkatësish 10 milion lekë në emër të I. L. dhe 21 milion lekë në emër të N. C., pa dijeninë e tyre. Këta të fundit rezultonin se kishin llogari të mëdha në këtë bankë, dhe për këtë nuk qënë e nevojshme lënia e një kolaterali si peng.
Pasi ka falsifikuar aplikimin për kredi, zv.Drejtoresha i ka tërhequr këto shuma, pra 32 milion lekë, duke plotësuar mandate me firmë të falsifikuar të dy klientëve tashmë debitor.
Skema e vjedhjes zgjerohet edhe më tej, me këstet e kredisë të paguara çdo muaj. Zv. Drejtoresha Albana Zeqaj sërish nëpërmjet falsifikimit ka tërhequr para nga llogaritë e dy klientëve I. L. dhe N. C., për të shlyer këstet mujore të kredisë që u ishte ngarkuar.
Pjesë e vjedhjes kanë qënë edhe disa klientë të tjerë, ku u janë mbajtur këste mujore nga llogaritë e tyre për të shlyer kredinë e dy klientëve që u ishte falsifikuar firma. Sipas hetimeve të prokurorisë por dhe të Kontrollit të Brendshëm të “Tirana Bank”, rezulton se të gjitha transaksionet janë kryer pas orarit të punës.
Falsifikimi i dokumentave dhe transaksioneve bankare është verifikuar edhe nga ekspertimi teknik-grafik.
E pyetur nga Prokuroria, Albana Zeqja ka pranuar veprat penale por ka dashur ta justifikojë me faktin se këtë veprim e kishte bërë për të ndihmuar financiarisht një mikun e saj, shtetasin S.K., i cili kishte një problem të rëndë shëndetësor.
Mëgjithatë ky justifikim nuk u mor parasysh nga Gjykata e Rrethit Gjyqësor Tiranë e cila pranoi kërkesën e akuzës duke e dënuar me 2 vjet burgim. Zv. Drejtoresha e “Tirana Bank” nuk bëri asnjë ditë burg, pasi gjykata duke vlerësuar rrethanat vendosi që të kryejë Shërbim Prove për 18 muaj.
Boldnews.al e pyeti “Tirana Bank” nëse ishte dakord për dënimin e marrë nga Gjykata ndaj ish punonjëses së saj. Gjithashtu kjo bankë e nivelit të dytë u pyet me fatin e klientëve të dëmtuar nga kjo skemë vjedhjeje, nëse ata janë dëmshpërblyer nga borxhet e ngarkuara nga Zv. Drejtoresha Albana Zeqaj. Por deri tani, “Tirana Bank” nuk i është përgjigjur kërkesave të Boldnews.al.
