Gjykata e Hagës dënoi ish-presidentin serb të Bosnjës, Radovan Karaxhiç, për gjenocid dhe krime kundër njerëzimit dhe e dënoi atë me 40 vjet burg.
Ditën e enjte Gjykata Penale Ndërkombëtare për ish-Jugosllavinë shpalli ish-presidentin serb të Bosnjës fajtor për nga disa nga krimet më të rënda në Europë që nga Lufta e Dytë Botërore dhe e dënoi atë me 40 vjet burg.
Ai u dënua për gjenocid në Srebrenicës në 1995, terrorizim të popullsisë së Sarajevës, persekutim dhe shfarosje të boshnjakëve dhe kroatëve në 20 komuna në të gjithë vendin dhe marrjen peng të paqeruajtësve të OKB-së.
Por ai u lirua nga akuzat për gjenocid në shtatë komuna boshnjake në vitin 1992.
Duke e shpallur Karaxhiçin fajtor për gjenocidin në Srebrenicë, gjyqtari O-Gon Kwon tha se pasi forcat serbe të Bosnjës sulmuan dhe morën enklavën e mbrojtur nga OKB-ja në korrik 1995, një “plan për të shkatërruar popullsinë myslimane” u zbatua në mënyrë të organizuar.
Gjykatësi tha se Karaxhiçi fliste me kode me këshilltarin e tij për Srebrenicën, Miroslav Deronjiç, dhe tha se të burgosurit ishin “mallra” që duheshin ndaluar.
“Një ditë më vonë, Deronjiç foli për vrasjen e burrave, gjë e cila tregon se në atë kohë tashmë ishte marrë një vendim. Ky model tregon se Karaxhiçi ishte dakord me planin e vrasjeve,” tha ai.
Karaxhiçi u shpall gjithashtu fajtor si pjesë e një sipërmarrje të përbashkët kriminale për të terrorizuar popullsinë civile të Sarajevës gjatë rrethimit të qytetit nga forcat serbe të Bosnjës nga viti 1992 deri në vitin 1995.
Si komandant suprem i Ushtrisë Serbe të Bosnjës, Karaxhiçi miratoi veprime ushtarake që zgjatën rrethimin dhe fushatën e sulmimit me artileri dhe sulme me snajper, gjë e cila rezultoi në vdekjen dhe plagosjen e mijëra njerëzve,” tha gjyqtari.
“Të gjithë civilët kaluan frikë dhe shumë vështirësi,” tha ai.
“Karaxhiçi e intensifikoi fushatën kur pala boshnjake nuk pranoi të bënte një marrëveshje paqeje me kushtet e tij,” shtoi ai.
Gjykata arriti në përfundimin se forcat boshnjake ndonjëherë hapën zjarr ndaj paqeruajtësve të OKB-së për të fajësuar serbët, por tha se incidente të tilla janë të rralla dhe nuk hidhnin poshtë faktin se forcat serbe të Bosnjës kryen krime kundër njerëzimit në Sarajevë.
Karaxhiçi u shpall gjithashtu fajtor për krime kundër njerëzimit dhe shkelje të ligjeve dhe zakoneve të luftës në 20 komuna boshnjake gjatë konfliktit.
Lideri serb i Bosnjës ishte indiferent ndaj mundësisë se mund të ndodhnin krime, tha O-Gon Kwon.
“Gjykata konstaton se vrasja, shfarosja dhe persekutimi ishin të parashikueshme nga Karaxhiçi,” tha gjyqtari.
Ai u dënua për persekutim, shfarosje, dëbim, zhvendosje me dhunë dhe dy akuza për vrasje në 20 komunat.
Por ai tha se gjykata nuk mundi të konkludojë se Karaxhiç “kishte synim gjenocidal për të shkatërruar një grup” në shtatë komunat.
Ai megjithatë u shpall fajtor për shfarosje nw komuna.
Ai u shpall fajtor për pengmarrje të paqeruajtësve gjatë konfliktit.
Gjykatësi tha se Karaxhiç ishte një forcë kryesore pas pengmarrjes së paqeruajtësve, duke i vënë personat në vende strategjike që do të ndalonin sulmet ajrore të NATO-s.
Në vendosjen për dënimin 40-vjeçar, gjykatësi tha se gjykata mori parasysh faktin se këto ishin disa nga krimet më të neveritshme, por pranoi si rrethana lehtësuese faktin e Karaxhiç u tërhoq nga jeta publike pas luftës në 1996.
70-vjeçari, ish-lideri politik i serbëve të Bosnjës ka këmbëngulur për pafajësi nga të gjitha krimet në aktakuzë, duke argumentuar se nuk ka urdhëruar asnjërin prej tyre.
Karaxhiç u arrestua në 2008 në Beograd ndërsa fshihej si një lider shpirtëror, pasi kaloi 12 vite arrati.
Gjyqi i tij filloi në tetor 2009 dhe më shumë se 500 dëshmitarë u dëgjuan gjatë seancave maratonë.
Vendimi mund të apelohet.
