Nën akuzën e “Shpërdorimit të detyrës” dhe “Shkeljes së barazisë në tendera”, Gjykata e Durrësit ka vendosur masën ndaluese “pezullim nga detyra” për drejtoreshën e spitalit rajonal, Ardjola Frashëri.
Kjo ishte një kërkesë e Prokurorisë së Durrësit, ku u mbështet mbi bazën e një raporti auditimi të Kontrollit të Lartë të Shtetit për veprimtarinë ekonomike të Spitalit Rajonal të Durrësit për periudhën 2013-2015.
Sipas organit të akuzës, rezulton se, në të paktën 23 raste, drejtoresha Frashëri, si edhe ish-drejtori Taulant Baku, i cili gjithashtu është nën hetim, kanë urdhëruar kryerjen e prokurimit publik me procedurën e “Negocimit pa njoftim paraprak”.
Në bazë të ligjit “Për prokurimin publik”, kjo procedurë aplikohet vetëm në raste emergjente. Nga hetimi rezulton se prokurorimet publike me negocim pa njoftim janë kryer në shkelje të ligjit, për faktin se nuk ka pasur asnjë arsyetim për kushtet e emergjencës.
Tenderat që janë kryer me “Negocim pa njoftim paraprak” kanë të bëjnë me blerje mallrash dhe shërbimesh si: blerje nafte, shërbim kateringu, shërbim ruajtje civile, riparim pavionesh, blerje materiale pastrimi, si edhe për blerje medikamentesh dhe materialesh mjekësore.
Në vijim të hetimit, Prokuroria e Durrësit do të analizojë dëmin e shkaktuar nga procedurat e dyshuara si të zhvilluara në kundërshtim me ligjin.
Sipas raportit të Kontrollit të Lartë të Shtetit, dëmi ekonomik llogaritet në vlerën e rreth 70 milionë lekëve. Por Prokuroria e Durrësit do të analizojë në detaje dëmin e shkaktuar.
Gjithashtu organi i akuzës i ka dërguar Ministrisë së Shëndetësisë vendimin e Gjykatës për pezullimin nga detyra të drejtoreshës Ardjola Frashëri,.
Ndërkohë, për ish-drejtorin Taulant Baku, nuk është kërkuar masë ndaluese, për faktin se ai nuk është në funksion publik.
