Kalimi i fazës së grupeve në Europianin e Francës, do të ishte një arritje madhështore, u shpreh trajneri i Kombëtares Shqiptare, Xhani De Biasi.
Tranjeri italian i kuqezinjëve doli sot në një konferencë për shtyp për t’u përballur me gazetarët në nisjen e grumbullimit për dy miqësoret e Marsit, ndaj Austrisë dhe Luksenburgut. Tekniku ish-Inter dhe Torino ka qenë mjaft i prerë me gazetarët, sa i takon përzgjedhjeve të tij, ndërsa ka shtuar se nga lojtarët kërkon të duan më shumë fanellën dhe grupin që përfaqësojnë sesa emrin e tyre.
“Miqësoret janë shumë të rëndësishme për të kuptuar gjendjen e lojtarëve, konkretisht Memushaj, të dëmtuar, teksa Hysaj ka probleme familjare. Kemi disa dëmtime, presim përgjigjet mjekësore për të parë nëse do jetë e mundur të aktivizojmë këto lojtarë. Lila e Abrashi vijnë me vonesë pasi do të zbresin sot në fushë me ekipet e tyre respektive. Do të kisha marre edhe Manaj, Rrahmani, Rashicën e Latifi, por kanë ndeshje vendimtare me Shpresat. Miloti do të jetë me ne për ndeshjen e dytë kundër Luksemburgut. Lista aktuale, është ajo më e përafërta me atë përfundimtare të Euro 2016. do të shikojmë deri në fund të sezonit si do të ecin lojtarët”, tha De Biasi.
Ai bëri të ditur se kjo listë është shumë e afërt me të që ai ka ndërmend të përpilojë për Europianin që do të zhvillohet në Francë gjatë muajve Qershor dhe Korrik. “Europiani është një pjacë që të gjithëve i pëlqen. Kjo listë është shumë pranë listës përfundimtare. Duhet parë gjëndja e lojtarëve deri në fund. Kam dëshirë të provojë dhe lojtarë të tjerë, të cilët mund të përshtaten me grupin. Ne nuk kemi lojtarë lider, por kemi grupin dhe të gjithë duhet të mendojnë më shumë për grupin sesa për veten. Vetëm kështu mund të arrijmë objektivin madhështorë të kualifikimit në fazën e grupeve gjatë Europianit”, tha De Biasi.
Lidhur me mos marrjen e lojtarëve nga kategoria superiore, De Biasi u shpreh se askush nuk duhet të fus hundët në punë e tij. “Shikoni listën e bëjë unë dhe përgjegjësit për rezultatet e punës sime i mbaj po unë. Unë nuk i them të tjerëve çfarë duhet apo nuk duhet të bëjnë. Nuk më pëlqen të fus hundët aty ku nuk më takon, prandaj i them të gjithëve mos fusni hundët tek përzgjedhja ime”, tha tekniku Italian.
Lista:
Portierë: Etrit Berisha, Alban Hoxha, Orges Shehi
Mbrojtës: Naser Aliji, Arlind Ajeti, Berat Dijmsiti, Mergim Mavraj, Lorik Cana, Elseid Hysaj, Ansi Agolli, Frederik Veseli
Mesfushorë: Migjen Basha, Ergys Kace, Ledian Memushaj, Odise Roshi, Herolind Shala, Ermir Lenjani, Taulant Xhaka, Burim Kukeli, Amir Abrashi, Andi Lila
Sulmues: Bekim Balaj, Sokol Cikalleshi, Armando Sadiku, Shkelzen Gashi, Milot Rashica (vetëm për Luksemburgun)
