Teksa vijonte punën Kongresi i Partisë Socialiste, ditën e sotme, dhe çdo dalje publike e anëtarëve të PS-së u shndërrua në lajm, nuk mbetën jashtë vëmendjes edhe makinat luksoze të parkuara kuturu në Bulevard.
Jashtë godinës së Pallatit të Kongreseve prisnin badigardët dhe shoferat e ministrave, deputetëve si dhe anëtarëve të PS-së bashkë me makinat e markave më të shtrenjta deri tek vitprodhimet më të fundit. Madje, një pjesë e bulevardit të Tiranës ishte bllokuar për qarkullimin normal të makinave. Boldnews në një vëzhgim jashtë Pallatit të Kongreseve ju sjell këto foto ku duken qartë makinat luksoze të anëtarëve të PS-së. Jashtë kongresit ishin shtuar dhe masat për ruajtjen e sigurisë nga efektivë të policisë së rendit dhe rrugor për çdo ndodhi në Kongres.
Afër shkallëve të Pallatit të Kongreseve qëndronte dhe një “Jaguar”, marka luksoze e shumëpërfolur dhe e debatuar nga opozita për pajisjen e ministrave me të tilla makina. Të binin në sy markat dhe tipet më të reja në treg si: Mercedes-Benz S Class, Audi A7, Audi Q7, Volkswagen Touareg, Phaeton, Porsche Cayenne, etj.
