Më shumë se 3 muaj i është dashur Policisë së Shtetit për të identifikuar një efektiv policie që i grabiti një shumë parësh një taksixhiu. Ngjarja ka ndodhur më 9 nëntor të 2015, ndërkohë që polici-grabitës Eduard Budini vijonte të ushtronte detyrën pranë FNSH në Dragot të Tepelenës.
“Në datën 09.11.2015, rreth orës 12:00, në rrugën ” 3 Dëshmorët” në Yzberisht, një person i paidentifikuar ka tentuar t’i vjedhë taksistit H. H., nën kërcënimin e një arme tip pistoletë, paratë e xhiros ditore. Rezulton se kontaktin me të dëmtuarin ai e ka patur pranë vendqëndrimit të zakonshëm të taksive tek Parku “Rinia”, ku aty i ka kërkuar një shërbim taksie deri në Yzberisht.”– thuhet në relacionin e Prokurorisë
Edhe pse i filmuar qartë me një kamera brenda takisë, Budini nuk u arrit të identifikohej. Ai u vu në pranga më 17 mars 2016 nga uniformat blu, pasi Policia e shtetit pranoi pjesërish dështimin dhe vendosi që ta shpërndajë videon e grabitjes me publikun.
Kjo vë në pikëpyetje edhe njëherë kapacitetet e Policisë së Shtetit në sektorin e zbulueshmërisë dhe identifikimit të autorëve.
Ndërkohë Gjykata e Tiranës ka dhënë sot masën e sigurisë “arrest me burg” për Eduard Budinin. Ai pranoi krimin në Gjykatë, duke theksuar se kishte shkuar për t’i kërkuar falje taksistit, por nuk e kishte gjetur.
“Vajta t’i kërkoja falje taksistit, por nuk e gjeta.”– u shpreh Budini.
Polici-grabitës gjithashtu paraqet si motiv për kryerjen e saj qënien nën efektin e alkoolit dhe gjendjes së rënduar psikologjike për shkak të pragndarjes nga bashkëshortja. Gjithashtu pohon se në ngjarje ka përdorur armën e shërbimit dhe se ishte penduar.
