Protestat e paralajmëruar të shoqatës së gjuetarëve kanë vijuar edhe ditën e sotme. Ata janë zhvendosur me pankarta para kryeministrisë duke kërkuar që të hiqet moratoriumi për gjuetinë nga qeverisë, i cili është shtyrë edhe për 5 vite të tjera.
Ndërkohë, i janë drejtuar kryeministrit Rama duke i thënë se po i ndërpret pasionin e tyre. “Si do rrinte Rama në qoftë se do ta linin pa pikturuar”, janë shprehur ata.
Shoqata e Gjuetarëve është shprehur se është dakort me forcimin e ligjit por ata janë kundër moratoriumit. Ata kanë paralajmëruar se protesta do të vazhdojë deri sa të marrin një reagim, pasi sipas tyre as Presidentin e Federatës Ndërkombëtare të Gjuetisë nuk e ka pritur Ministri i Mjedisit, Lefter Koka.
Moratoriumi i gjuetisë pritet të shtyhet edhe për 5 vite të tjera nga qeveria, ndërkohë që në vend janë shënuar me dhjetëra raste paligjshmërie. Për shoqatat e gjuetarëve dhe peshkatarëve kjo mase nuk rezultoi e suksesshme. Ligji për moratoriumin e gjuetisë u miratua në janar të vitit 2014 dhe përfundonte ketë vit, por u kërkua shtyrja e tij.
