Prokuroria nuk i ka pranuar provat e paraqitura nga Policia për arrestimin e administratorit të Omega Pharma, Fatos Çausholli dhe ka kërkuar caktimin e masës “detyrim paraqitje” për të dhe agjentin doganor Mirlind Berberi.
Prokuroria e Tiranë vlerëson se, në bazë të fakteve të referuara deri më tani nga autoritetet doganore dhe Policia e Shtetit, shtetasit Fatos Çausholli, administrator i kompanisë “Omega Pharma”, si edhe agjenti doganor Mirlind Berberi nuk kanë konsumuar elementët e veprës penale të “Kontrabandës me mallra të tjerë”, për të cilën janë arrestuar në flagrancë në dt. 12.03.2016.
Gjithsesi, Prokuroria e Tiranës po kryenr veprimet e nevojshme dhe të plota procedurale, për të arritur në një konkluzion përfundimtar. Në këto kushte, Prokuroria kërkon caktimin e masës “detyrim për paraqitje” për shtetasit Çausholli dhe Berberi.
Në bazë të veprimeve të ngutshme procedurale, për shkak të afateve procedurale, Prokuroria e Tiranës shqyrtoi praktikën doganore të dy kamionëve që po transportonin medikamente mjekësore nga Maqedonia për llogari të Omega Pharma në Shqipëri.
Sipas referimit të veprës penale nga institucionet e tjera, ishin krijuar dyshimet se ngarkesa në dy kamionët kishte mospërputhje me faturat shoqëruese, duke u krijuar dyshimet për kontrabandë me një vlerë rreth 4 milionë lekë të reja.
Nga veprimet verifikuese të Prokurorisë së Tiranës rezultoi që malli faktit në dy kamionët nuk korrespondonte me faturat shoqëruese. Megjithatë, sasia në total e mallrave që gjendej në dy kamionët dhe për të cilat ishin paguar vlera e zhdoganimit, ishte e përafërt me atë që gjendej në të dy faturat shoqëruese të kamionëve. Sipas përfaqësuesve të kompanisë që priste mallin, pra “OmegaPharma”, duket se është bërë një gabim njerëzor në plotësimin e faturave nga kompania maqedonase. Për më tepër, duke qenë se kontrolli fizik i dy kamionëve vijoi rreth dy ditë, përfaqësuesit e Omega Pharma siguruan një faturë të tretë nga kompania maqedonase, në të cilën saktësohej se ishte gabimi i tyre njerëzor në plotësimin e dokumentacionit. Në këtë faturë të tretë, të depozituar nga kompania, ishte bërë një përmbledhje e mallit dhe e vlerës totale që gjendej në të dy kamionët dhe për të cilët ishte kryer pagesa e zhdoganimit.
Gjithsesi, nga kontrolli fizik dhe shqyrtimi i dokumenteve, Omega Pharma duhet të paguajë edhe shumën e 1.4 milionë lekëve mbi pagesën e kryer deri më tani. Por gjithsesi, kjo përllogaritje nuk është përgjegjësi as e kompanisë dhe as e agjentit doganor privat, por e administratës doganore.
Pasi janë kryer këto veprime deri në këtë fazë sipas materialit referues, Prokuroria e Tiranës nuk ka krijuar bindjen se dy shtetasit kanë kryer veprën penale të “Kontrabandës me mallrat ë tjerë…”
Gjithsesi, për shkak të kohës së shkurtër të kryerjes së veprimeve të ngutshme hetimore, Prokuroria e Tiranës vlerëson se duhet të kryhen edhe disa verifikime të tjera për këtë rast. Për këtë arsye, Prokuroria e Tiranës kërkoi caktimin e masës “detyrim për paraqitje” për shtetasit Fatos Çausholli dhe Mirlind Berberi, deri në përfundim të hetimeve.
(Boldnews)
