Po ndiqen penalisht 14 aktivistët e Aleancës Kuq e Zi, të cilët përdorën zinxhirë dhe dryn për të mbyllur derën e Ministrisë së Jashtme paraditen e sotme në formë proteste. Shoqërimi i tyre u bë si shkak i protestës së tyre pa leje.
Pasi kanë mbyllur derën e Ministrisë aktivistët janë arrestuar nga policia. Me pankarta në duar “Shqipëria mbi partitë” aktivistët penguan Ministrin Bushati të hyjë në zyrë duke i kërkuar atij të jap dorëheqjen.
Pak ditë më parë aktivistët e AK mbyllën me dryn e zinxhir edhe derën e Bashkisë së Tiranës duke mos lejuar hyrjen e kryetarit të Bashkisë Erion Veliaj.
Kreu i Aleancës Kuqezi Kreshnik Spahiu u shoqërua në ambientet e komisariatit numër 1, si pasojë e një protestë pa leje që AK zhvilloi para Bashkisë së Tiranës. Bashkë me të, u shoqërua edhe nënkryetari i Aleancës Kuq e Zi, Flavio Qarri, të cilët patën përleshje me policinë gjatë tentativës për tu futur në bashki e për të zënë derën me dërrasa.
