Këshilltari i Ministrisë së Financave i Republikës së Shqipërisë, Knidi Bashari, është vënë në mbikëqyrje nga Byroja Federale e Hetimit në SHBA pasi i janë zbuluar 5245 veprime elektronike të cilësuara si kriminale, duke infektuar 475.532 adresa IP në 225 shtete,të cilësuara nga FBI si viktima.
41-vjeçari Bashari rezulton sipas FBI të jetë i implikuar në një megamashtrim kompjuterik dhe mashtrime me transferta elektronike. Ai është gjurmuar prej janarit 2015 nga FBI dhe Seksioni i Krimit Kompjuterik dhe Pronës Intelektuale i Departamentit Amerikan të Drejtësisë
Mes viktimave është dhe vetë kompania prestigjoze “Microsoft”.Këshilltari i ministrisë së Financave, rezulton të ketë hyrë pa autorizuar në rrjetet kompjuterike, duke interceptuar kredencialet e llogarive të përdoruesve të shërbimeve të shumta në rrjet, duke bërë të mundur sulme të grupuara për mohimin e shërbimeve dhe duke krijuar një mekanizëm për infektime të mëtejshme.
Bashari, rezulton të ketë qenë një nga aksionerët e kompanisë kompjuterike “Keminet”. Kjo kompani ushtron aktivitetin duke ofruar shërbime elektronike dhe internet, dhe se prej disa vitesh ka fituar dhjetëra tendera publikë, duke kryer shërbime në disa institucione të rëndësishme, përfshirë këtu dhe tek ato që janë të rëndësisë së veçantë, siç është Ministria e Brendshme, Ministria e Jashtme dhe Presidenca.
Pikërisht mbi këtë kompani FBI prej më shumë se një viti po kryen hetime për akuzën e “Mashtrim dhe aktivitet në lidhje me kompjuterët” dhe “Mashtrimi nëpërmjet transfertave elektronike”. Sipas FBI nëpërmjet mekanizmave elektronikë, nga serverat e kompanisë “Keminet” janë marrë shumë të dhëna.
