Ka përfunduar Asambleja e Partisë Socialiste e cila është përfshirë nga përplasje dhe mendime të kundërta mes palëve që kërkojnë zgjedhje për kryetarin dhe atyre që e cilësojnë të panevojshëm një votim të tillë.
Pasi Edi Rama hodhi në tryezë idenë e referendumit për konfirmimin e kryetarit të PS, ishte deputeti Ben Blushi i cili e kundërshtoi një gjë të tillë. Në fjalimin e tij në Asamblenë me dyer të mbyllura Blushi paralajmëroi edhe daljen nga Partia Socialiste.
“Kam kërkuar vetëm zbatimin e statutit të PS. Nuk mund të ketë zgjedhje për çdo forum dhe jo për kryetarin e partisë. I kam dorëzuar propozimet që i kam bërë Asamblesë së PS. Nëse duhet të zgjedh mes partisë dhe Shqipërisë, zgjedh vendin. Statuti është si një makinë që ka gjithçka, por jo timon.”– është shprehur Blushi.
Gjatë fjalës së Blushi, kryeministri Rama ka lënë sallën e asamblesë për të marrë një pushim të shkurtër.
Ndërkohë më pas, me një fjalim gjysëm të porositur, 3 deputetë socialistë kundërshtuan njëri pas tjetrit kolegun e tyre Ben Blushi.
“Mes Shqipërisë dhe Partisë, unë zgjedh Partinë”- është shprehur Taulant Balla.
“Nuk shoh ndonjë ndryshime mes shqipërisë dhe partisë.”– ka deklaruar Ditmir Bushati.
“Nuk jam dakord me Ben Blushin që Shqipëria ka më shumë rëndësi se partia.” – është shprehur Pandeli Majko
Deputeti Bashkim Fino ka dalë kundër idesë së Kryeministrit Edi Rama që mandatin e tij si Kryetar i PS-së ta përcaktojnë socialistët me një referendum. Fino, si një hartues i Statutit të ri të PS-së, e cilësoi një manipulim propozimin e Ramës për referendumin,
“Është një hedhje dorashke ndaj atyre pak kundërshtarëve që ka në Asamble, me të cilën ata duhet të ngelen të kënaqur, por ajo do të bjerë ndesh me Statutin e ri dhe unë jam kundër idesë që hodhi Rama për mandatin e vet. Unë jam duke thënë mendimin tim, dhe nëse miratohet statut i ri në Kongres, ai bie ndesh me referendumin që ngriti Rama.” – u shpreh Fino.
Në mbështetje të deputeti Ben Blushi u rendit fuqimisht Arta Dade, e cila mbajti një fjalim duke vënë në skaner edhe performancën e qeverisë. Mesazhi i ripërsëritur i saj ishte mbajtja e zgjedhjeve për kryetar të PS.
“Nuk mund të shkojmë në zgjedhje me një kryetar që ka 7 vjet pa u zgjedhur. Mungesa e demokracisë mund të na largoje nga partia nëse vijohet kështu”– është shprehur Dade teksa ka provokuar Ramën duke i thënë dëshirën për tu bërë kryetare e Partisë Socialiste.
Ndërkohë deputetja shkodrane Mimoza Hafizi është shprehur e trembur ndaj veprimeve kryeministrit Rama për pengimin e zgjedhjeve brenda partisë.
“Ndjehem e kërcënuar, Rama të kërkojë ndjesë ndaj nesh.”– ka thënë Hafizi.
I fundit që foli për mbledhjen e Asamblesë ishte kryetari i grupit parlamentar Gramoz Ruçi i cili i shprehu një irritim ndaj mediave për mënyrën sesi përcjellin zhvillimet brenda Partisë Socialiste.
“ Cilat ishin vendimet e Asamblesë, mendimet apo zugjerimet pas 2 orësh cfarë është thënë pa as më të voglin censurë do ta gjeni në faqen online të PS. Nuk mund të them asgjë. Deri më sot, keni 6 muaj që keni thënë gjithçka për PS, por atje të nxirrni konkluzionet. Si dhe sa në PS ka demokraci, si dhe sa në PS ka censurë dhe si dhe sa merren vendimet në forumet e PS.” – u shpreh Ruçi para mediave.
