Boldnews.al denoncoi më herët sesi kompleksi “Magnet”, e ndërtuar nga kompania “Kontakt”, ofron çmime të kripura për apartamentet por nuk ka kushtet më minimale të higjenës. Përveç kësaj, punimet në këtë kompleks, janë skandaloze dhe jo sipas standarteve që mund të ketë një pallat.
Banorë të këtij kompleksi ankohen se papastërtia në shkallë është e përditshme, pavarësisht se të gjithë paguajnë një shumë prej 30 mijë lekësh (të vjetra) në muaj për Administratorin e Pallatit.
E sikur mos të mjaftonin plehrat në shakkë dhe mbeturinat të shpërndara gjithandej, pronari i kompanisë “Kontakt”, i quajtur Fatmir Bektashi, ka vendosur një njoftim diskriminues ndaj banorëve të pallatit, prej të cilëve ka përfituar qindra mijëra euro.
“Të nderuar banorë, ju lutemi bëhuni pjesë me ne dhe mos lejoni fshatarë që kanë zbritur në qytet, që s’kanë lidhje me ju, të ndotin ambientin, duke hedhur plehra kudo ecni, njësoj si kafshët që kanë në shtëpitë e tyre. Ne vetëm, pa ndihmën tuaj nuk ia dalim dot”, – thuhet në lajmërimin e vendosur në hyrje të një prej godinave të kompleksit “Magnet” që ndodhet pranë 21-Dhjetorit në Tiranë, e nënshtruar nga Administratori i përgjithshëm, Fatmir Bektashi.
Ky diferencim skandaloz i banorëve të një pallati, ku disa quhen qytetarë e të tjerë fshatarë, kurrësesi nuk mund të bëhet nga një pronar pallati, i cili ka përfituar qindra mijëra euro nga shitja e apartamenteve.
Boldnews.al disponon edhe fotot e një prej hyrjeve të kompleksit “Magnet”, që përveç papastërtisë, ka edhe shqetësim për hapësirat e përbashkëta të pallatit. Mbi 66 familje lëvizin çdo ditë në korridorin e shkallës që është jo më shumë se 120 cm. Gjithashtu këto familje mbajnë radhën me minuta të tëra për ashensorin. E gjithë shkalla që ka mbi 200 banorë (66 familje) ka vetëm 1 ashensor.
Boldnews.al do të vijojë të denoncojë abuzimet ndaj qytetarëve nga kompanitë e ndërtimit, ku ndryshe u premtohet përpara blerjes dhe ndryshe rezulton në fund të ndërtimit.
