Në një kohë që qeveria thotë se procesi i rindërtimit pas tërmetit të 26 nëntorit të vitit 2019 vijon me ritme të shpejta dhe se janë ndihmuar familjet e dëmtuara, për disa familje është një realitet ndryshe.
Prej vitit 2019 Klodian Merepeza nga Peza jeton në kontejner, pasi shtëpia ku banonte, iu shemb nga tërmeti i vitit 2019.
Ai jeton në këtë hapësirë të vogël me bashkëshorten, 2 prindërit, e katër fëmijët e mitur.
Klodiani thotë se ka tre vite që interesohet për ndërtimin e një banese të re, e ka ndjekur të gjitha procedurat e nevojshme, por deri më tani pa rezultat. Ai fajëson qeverinë për neglizhencë.
Bashkëshortja e Klodianit, rrëfen mes lotësh se merakoset vetëm për fëmijët. Ata nuk kanë ku të mësojnë dhe kanë frikë nga egërsirat, që mund të zbresin nga maja e kodrës pranë banesës së tyre. Më të vështirë e ka komunikimin me vajzën e madhe, që sapo ka përfunduar klasën e 7. Pyetja që e mundon më tepër, e që ajo nuk di se si t’i japë përgjigje është: “Po unë përse nuk kam një shtëpi si të gjitha shoqet”.
Bashkë me Klodianin jetojnë edhe prindërit e tij. E ëma, thotë se jeta e saj tashmë është e përqendruar vetëm te problemi i djalit dhe si nënë, kërkon që edhe ai të ketë një strehë të rehatshme ku të rrisë fëmijët.
