Nënkryetari i PD, Luçiano Boçi, përmes një deklarate ka përshëndetur ‘zhbllokimin’ nga Bullgaria të procesit të negociatave me BE për Maqedoninë e Veriut dhe Shqipërinë, por shton se shkaku i ngecjes së Shqipërisë janë manipulimi i zgjedhjeve, korrupsioni, shpopullimi i vendit dhe vjedhja e pasurive publike.
Boçi duke komentuar vendimin e Parlamentit bullgar thotë se ky është një hap i parë kyç në zhbllokimin e negociatave për anëtarësim të Shqipërisë dhe Maqedonisë së veriut në Bashkimin Europian.
“Duke shtuar këtu se, heqja e vetos do ta rifusë procesin e integrimit në shinat e vërteta, ato të meritokracisë,
Partia Demokratike beson se nuk është vetoja bullgare arsyeja e moshapjes së negociatave, por një radhë shkaqesh të tjera:
Ndër to:
-Shpopullimi masiv i vendit, që ka derdhur në dyert e Europës më shumë shqiptarë se sa banorë të zonave të luftës në Afrikë dhe Lindje të Mesme;
-Korrupsioni me shokët ministra dhe shokët e ministrave, një pjesë në kërkim kombëtar e ndërkombëtar;
-Përfshirja në vjedhje të pasurive publike, në trafik droge, dhe dhënia e statusit të investitorit strategjik të familjarëve të ministrave.
-Njolla e zgjedhjeve të manipuluara, që e kemi parë në kaq shumë përgjime e raporte”, tha Boçi.
Në vijim, nënkryetari demokrat shprehet se kur Rama thotë se Europa është më e sëmurë se Putini, ne i kujtojmë zotërisë në fjalë se Shqipëria, nën keqqeverisjen e tij, është kthyer në të ‘sëmurën e Europës’.
