Ky është dokumenti i policisë italiane lidhur me identitetet e rremë që ka mbajtur ish-deputeti socialist Armando Prenga në Itali.
Prenga po hetohet në kuadër të ligjit të dekriminalizimit.
Sipas dosjes se hartuar nga autoritetet italiane Mondi Prenga rezulton të kishte dhe emrat si Mondi Prenga Ardian Ndoka, Mond Gjoni, Gjoni Don, Arjan Ndoci, Arjan Noc, Arjan Ndoci, Arjan Noci, Mondj Prenga dhe Mondi Prenga.
Në dokument thuhet se nga drejtësia italiane Prenga nuk është në kërkim pasi vepra penale rezulton te jete e parashkruar.
Sipas prokurorisë Armando Prenga rezulton të jete i dënuar me gjobë nga gjykata e Kurbinit për falsifikimin e dokumenteve.
Për këto arsye deputeti Prenga sipas akuzës është subjekt i ligjit te dekriminalizimit dhe sipas Prokurorisë së Përgjithshme duhet t’i hiqet mandati i deputetit.
Armando Prenga është aktualisht në një proces në Gjykatën e Lartë ku akuzohet për plagosje te lehtë me dashje pas një konflikti për pronësinë e lagunës së Patokut.
Prokuroria e Përgjithshme ka kërkuar t’i ndërpritet mandati deputetit të Kuvendit, Armando Prenga, në kuadër të ligjit të dekriminalizimit.
“Sektori i “Dekriminalizimit” në Prokurorinë e Përgjithshme ka konstatuar se subjektit Armando Prenga i duhet ndërprerë mandati i deputetit, pasi rezulton që nuk ka deklaruar një dënim të formës së prerë, dhënë nga Gjykata e Rrethit Gjyqësor Kurbin, për veprën penale të “Falsifikimit të dokumenteve”, me 450 000 lekë gjobë si edhe faktin që rezulton me precedentë penale në shtetin italian për vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë në vitet 1996-1997 në qytetin e Milanos.
Këto të dhëna janë konfirmuar nga komunikimi zyrtar me autoritetet italiane”, thuhet në njoftimin e Prokurorisë së Përgjithshme.
