Deputetja e Partisë Demokratike, Flutura Açka, ka publikuar një mesazh në rrjetet sociale, ku thekson edhe njëherë kritikat e saj për politikën shqiptare.
Açka shprehet se merret me politikë dhe e di që politika e kërkon që “ju të hani njëri-tjetrin”, duke shtuar se është më mirë që secili të merret me punët e tij dhe jo të shajë lart e poshtë.
“Një pjesë e jona nuk dëshiron të ndryshojë, ajo njeh vetëm: o me mua, o kundër meje!”, shkruan deputetja.
Mesazhi nga Flutura Açka
Ore zotëri 👓
apo ti moj zonjë e frustruar!
Merruni me punë më të mbara se të shani lart e poshtë! Shihni ndonjë film të bukur (jo ato telenovelat turke me tradhëtira e vrasje), shkoni në ndonjë teatër, lexoni ndonjë libër (jo nga ato qurra-e-lot). Jemi kthyer në popull Facebook-u, që vetëm shprazim gorgën tonë shpirtërore nëpër dritaret e dynjasë.
Unë me politikë merrem dhe e di se politika kështu ju do, të hani njëri-tjetrin, që ajo ta ketë të gjatë jetën parazite në të shumtën e kohës së saj.
Kur shoh kaq nervozë njerëzore (jo politike e të ndershme dhe që përdor argumente), e kuptoj se pse kemi kaq shumë fëmijë të keqtrajtuar, kaq gra të dhunuara e të vrara.
Sepse një pjesë e jona nuk dëshiron të ndryshojë, ajo njeh vetëm: o me mua, o kundër meje!
Nuk kam shumë fuqi për thirrje politike, amnistira shpirtërore a për lëvizje emancipuese radikale, sepse ato shpesh janë kambana të zbrazura në trojet tona.
Më e vogla që mund të bëj, është t’ju ofroj një kafe elegante mirëkuptimi kujtdo që i dukem si trofe lufte. Pas asaj, nëse ende bluani zemëratë, ose pështuni ujin, ose pasqyrën që keni përballë!
Jeta është shumë e shkurtër për ta harxhuar sopeve me hithra!
