Ky që shihni në foto është 26-vjeçari, Martin Çeço, që tri ditë më parë u raportua i mbytur në rezervuarin e Kolanecit në Maliq, por nga hetimet ka rezultuar se i riu është vrarë.
Në trupin e viktimës, ekspertët kriminalistikë të Policisë së Korçës kanë evidentuar në pjesën e fytit shenja që policia dyshon se i janë shkaktuar nga 3 persona të cilët tashmë janë arrestuar. Kështu në pranga përfunduan Bleti Angjo, Valter dhe Edlir Mollaj. Dy të fundit kushërinj me njëri tjetrin.
Autorët dyshohet se pasi e kanë mbytur me litar 26-vjeçarin e kanë futur rezervuar për të fshehur gjurmët ndërsa jashtë tij kanë lënë shapkat e të riut për të krijuar dyshimet për vetëvrasje.
Shkak i vrasjes dyshohet se u bë një vajzë. Burime bëjnë me dije se Martin Çeço kishte njohje me një vajzë me të cilën komunikonte vazhdimisht. Për këtë fakt janë vënë në dijeni autorët të cilët i kanë kërkuar 26-vjeçarit të mos e vazhdojë këtë bisedë pasi njëri prej tyre ishte në lidhje me vajzën.
Të njëjtin kërkesë ata mësohet se ja kanë komunikuar dhe të atit të viktimës, por as kjo nuk ka bindur 26-vjeçarin të ndërpriste komunikimet me të renë.
Motra e Viktimës, Katerina Ago, që jeton në Greqi shprehet se tre ditë më parë kishte folur me të vëllanë dhe se ai i kishte rrëfyer se ishte i mërzitur sepse po e kërcënojnë disa persona.
Katerina Ago, e motra e viktimës: Nuk më tregonte se me kë kishte konflikt dhe cilët ishin personat që e kërcënonin. Ishim në dijeni të lidhjes me një vajzë por nuk e njihnim. Edhe babait i kishte treguar që e kërcënonin disa persona por arsyet dhe emrat e tyre nuk na i tregonte. Vëllai jetonte vetëm me babanë. Ky i fundit është në gjendjë të rëndë psikologjike në spitalin e Korçës.
Ndërsa një prej fqinjëve, Ditke Dokolli tregon se viktima dhe i ati punonin së bashku dhe nuk kishin konflikte.
Ditke Dokolle: Jetonin me djersë dhe mezi nxirrnin bukën nga toka. Martini ishte tip i mbyllur dhe nuk i binte në qafë njeriu. Jemi të tronditur nga kjo që ka ndodhur.
Martin Çeço përshkruhet nga banorët e zonës si person që nuk lëvizte nga fshati, por puna e tij e vetme ishte prerja e lëndës drusore së bashku me të atin. Ishte pikërisht ky i fundit që denoncoi në polici zhdukjen e të birit më datë 12 Qershor.
