Koço Kokëdhima vijon sulmet dhe akuzat ndaj Erion Veliajt dhe Saimir Tahiri, duke i quajtur ato dy “princat” e Rilindjes.
Duke folur nga qyteti i Elbasanit, Kokëdhima tha se Veliaj e Tahiri kanë marrë peng Partinë Socialiste të Tiranës. Sipas Kokëdhimës ata ëndërrojnë të bëhen pasardhës të kryetarit të madh.
Ja çfarë shkruan Kokëdhima:
Saimiri dhe Erioni janë dy “princat” e Rilindjes
Nga Elbasani ju drejtova me një pyetje udhëheqësve të lartë të Partisë Socialiste se e kujt është partia e Tiranës, e socialistëve të bazës, apo e udhëheqjes! Thashë se Saimiri dhe Erioni janë dy “princat” e Rilindjes që e kanë marrë peng Partinë Socialiste të Tiranës! Ata ëndërrojnë që të bëhen pasardhës të kryetarit të madh. Dhe kryetari i madh ua ka ushqyer këtë ëndërr dhe ua ka dorëzuar të drejtat e socialistëve të Tiranës, nevojave karrieriste të këtyre dy “princave” rivalë! Kjo është e paprecedentë në historinë politike. Kjo është kultura e klaneve, e regjimeve dhe diktatorëve që i lënë e i caktojnë vetë trashëgimtarët dhe pasardhësit e pushtetit! Këto sjellje e veprime nuk kanë lidhje me kulturën e një partie politike.
