Një operacion anti-drogë i Karabinierëve të Compagnia di San Benedetto, çoi në sekuestrimin e një sasie prej 20 kg kokainë, me një vlerë prej 1 mln euro.
Droga u zbulua në një çerdhe përgjatë Valtesino, në Grottammare mes 25-26 majit 2022. Policia arrestoi disa persona, mes të cilëve njëri u prezantua si Agim Kajmaku, datëlindja 6 korrik 1971, të dhëna që përkojnë me ish-Kryebashkiakun socialist të Vorës, i cili humbi mandatin pak muaj pasi ishte zgjedhur si kryebashkiak, për shkak të ligjit të dekriminalizimit.
Sasia e madhe e drogës ishte fshehur mes vazove të aktivitetit hortikulturor, pa dijeninë e pronarëve, të pavetëdijshëm se kopshti i tyre ishte bërë një strehë ku ruheshin lumenjtë e drogës me destinacion Rivierën Picena dhe më gjerë.
Të arrestuarit u çuan në paraburgim, ndërsa hetimet drejtohen nga Prokuroria e Fermos. Video e mëposhtme tregon momentet e operacionit policor.
Mediat italiane raportonin mbi një sasi prej 20 kilogramë drogë. Dyshimet lidhur me atë se çfarë po ndodhte janë ngritur nga pronarët ku u gjet dhe u sekuestrua droga. Mediat italiane raportojnë se ishin pikërisht pronarët që për shkak të erës jo të zakonshme, ti drejtohen policisë, e cila më pas ka organizuar operacionin.
Agim Kajmaku u zgjodh në krye të Bashkisë Vorë në zgjedhjet e 30 qershorit 2019, por u denoncua nga PD se kishte fshehur dënimin në Greqi për falsifikim parash dhe se kjo nuk ishte deklaruar në formularin e dekriminalizimit.
Fillimisht kjo u mohua prej tij, por më pas u vërtetua nga prokuroria e Tiranës përmes një letërporosie dërguar autoriteteve greke se ai ishte në kërkim në 2003 për falsifikim të kartëmonedhave dhe nuk ishte arrestuar pasi kishte ikur në Shqipëri.
Nga përgjigjja që Interpol Greqia dhe Interpol Tirana i kanë dërguar Prokurorisë së Përgjithshme, është vërtetuar se gjurmët e gishtërinjve të Agim Kajmakut janë të njëjta me Jorgo Toton, i cili është arrestuar në Greqi dhe këtë arrestim nuk e ka deklaruar kur ai kandidoi për zgjedhjet e 30 qershorit nën siglën e PS-së.
