Zv.Kryeministri Arben Ahmetaj iu përgjigj nga salla e Kuvendit akuzave të kreut demokrat Sali Berisha lidhur me Ballkanin e Hapur dhe Bordet e Transparencës.
Ahmetaj tha se nga nisma e Ballkanit të Hapur përfitojnë qytetarët, ndërsa shtoi se kjo iniciativë ka mbështetjen e BE dhe SHBA-së dhe është gjëjë më e mirë që i ka ndodhur Ballkanit. Ahmetaj tha se “Open Balkan” është teori ekonomike dhe politike.
“Kush qesh nuk e di thelbin e Open Balkan. Veprimet e këtij njeriu (Berisha) kanë qenë kundër që nga dita e parë e luftës së Kosovë deri te shpallja e pavarësisë. Open Balkan është gjëja më e mirë që i ndodh Ballkanit. Është teori ekonomike dhe politike. Janë qytetarët që përfitojnë. Ballkani është 100 herë më i qetë sesa ka qenë 10 vite më parë”, tha Ahmetaj.
Duke iu referuar situatës së çmimeve, ai theksoi se Shqipëria ka inflacionin më të ulët në Ballkan. Ahmetaj u shpreh i prerë se Bordi i Transparencës do të vazhdojë të ekzistojë.
“Inflacioni në Shqipëri është më i larti në Ballkan. Më gjeni një paketë sociale që ju keni bërë. E përmbytët Shkodrën dhe dëmshpërblimin ia dhamë ne.
Përpos të tjerave ne do të vazhdojnë, Bordin e Transparencës do ta mbajmë për të mos lejuar tregun të manipulojë”, tha Ahmetaj.
Më herët, ish-kryeministri Berisha tha se çmimet janë rritur si në asnjë vend tjetër, ndërsa u bëri thirrje qytetarëve që të reagojnë me protesta.
Bordin për çmimet, ish-kryeministri e cilësoi si metodë komuniste që po iu pi gjakun shqiptarëve.
“Pandemia mori në këtë vend më shumë jetë se në çdo shtet tjetër të Evropës. Çmimet janë rritur këtu më shumë se në çdo vend tjetër dhe zgjidhja e vetëm është ajo komuniste e bordeve.
Si mund të pretendohet të zëvendësohen bordet rregullatore me borde vampire që janë ngritur me vendim qeverie për tu pirë gjakun shqiptarëve. A përfaqësoni ju qytetarët? Si ka mundësi të ngrohet ish ministri i Bujqësisë dhe të thotë se fermerët po eksportojnë.
Ju që flisni se janë rritur eksportet shkoni në Myzeqe. Jam këtu për tu bërë thirrje shqiptarëve të ngrihemi. Më thoni mua”, tha Berisha, i cili e konsideroi Edi Ramën një vasal të Aleksandar Vuçiç.
