“U nis vajza!”Ishte ky mesazhi që u gjet në telefonin e ish-komandos Neim Avdyli, njëri nga të arrestuarit për grabitjen e parave të bankës në Qafën e Kasharit më 9 Shkurt.
Ky mesazh është edhe një ndër provat kryesore që ka në dorë prokuroria që përfshin Neimin si informator dhe vëzhgues në bandën e grabitësve të bankës.
I arrestuari ka pranuar sot para gjykatës, e cila e la nën masën e sigurië “arrest me burg”, se në bandë kishte rolin e vëzhguesit.
Ai tha para togave të zeza se ditën e grabitjes ka parë se sapo doli eskorta nga banka, dërgoi mesazhin anëtarëve të tjerë të grupit me përmbajtjen “u nis vajza”.
Madje 25 minutash nga koha e marrjes së mesazhit, ka ndërhyrë edhe pjesa tjetër e grupit për të kryer grabitjen në Qafë Kashar.
Avdulaj ka treguar edhe detaje për paratë e vjedhura, ku tha se ato i ndante mes vetes dhe Fation Xhyliut, të penduarit të bandës. “I fshehja që t’i përdorja më vonë”, ka deklaru ndër të tjera ai.
Më pas tha se paratë i këmbenin në pika të ndryshme këmbimi valutor në sasi të vogla që të mos binin në sy.
Kryesisht nën 3.000 paund këmbeheshin në Lushnje dhe në Fier.
Nga ana tjetër Ernest Kupa nuk e ka pranuar akuzën dhe ka thënë se ai është arrestuar pa prova ndaj tij.
Prokuroria kishte kërkuar “arrest me burg” për të dy.
Kupa, i cili është djali i xhaxhait të Ilir Kupës, po hetohet nëse ka qenë apo jo pjesë e “bandës së babagjyshëve”.
Grupi kriminal u hetua nga Prokuroria e Krimeve të Rënda për dhjetëra grabitje në Tiranë e rrethe, por mendohet se Ernest Kupa i ka shpëtuar identifikimit në hetimin e parë, edhe pse ka qenë pjesëmarrës në krimet e realizuara nga grupi i “babagjyshëve”.
