I ftuar në Task Force në SYRI TV, anëtari i Kryesisë së PD-së Aldo Bumçi ka folur për ‘Presidentin e ri’ i cili do zgjidhet nga mazhoranca socialiste në raundin e radhës.
Bumçi ka theksuar se sot opozita është më e fortë se kurrë dhe kjo opozitë u ringrit nga hiri në një proces shtatë mujor.
Për sa i përket procesit për zgjedhjen e presidentit, Bumçi tha se një grup deputetësh u keqpërdorën nga Rama dhe uron që ta kuptojnë se kjo linjë nuk i shërben asnjë të mirë dhe kanë mundësinë që të kthehen në përfaqësues të atyre që i kanë votuar.
“Jemi në një republikë që ka shkatërruar çdo balancë pushtetesh. Jemi një republikë tërësisht e kapur pa asnjë kontroll dhe balancim pushtetesh, që është thelbi i demokracisë dhe nuk ka iluzione se Rama donte ta normalizonte situatën dhe këtë vend, por ai si kryeministër shkon drejt kapjes së gjithçkaje siç e tregoi edhe me kapjen e Federatës së Futbollit, dhe problemi më i vogël është se një pjesë e deputetëve që veprojnë jashtë vullnetit të opozitës në terren janë individë në parlament por nuk kanë tagër përfaqësimi. Janë numrat që përcaktojnë nëse ke tagër apo jo. Ku është sot opozita e ka treguar në katër procese, tre procese partiake dhe në 6 mars kur dolën dhe votuesit.
Ne sot kemi më shumë fuqi se kurrë. Sot jemi gjallë dhe të vërtetë. Sot ka një opozitë dhe kjo u ngrit në një hark shtatë mujor nga hiri i shtatorit dhe nuk kishte një projekt që mos të kishte një opozitë pasi ai projekt falë demokratëve u gris dhe sot ka një opozitë të vërtetë.
Ne jemi gati të përballemi në zgjedhjet lokale dhe forca do tregohet në zgjedhjet lokale. Protesta është pjesë e një aksioni opozitar.
Problemi është Rama. Njerëz të cilët kanë mandatin e deputetit por nuk përfaqësojnë njeri nëse vazhdojnë kështu. U keqpërdorën nga Rama dhe shpresoj që të kuptojnë se kjo linjë nuk i shërben asnjë të mirë dhe kanë mundësinë që të kthehen në përfaqësues të atyre që i kanë votuar”, tha Bumçi.
