Ditën e Shtunë pritet të zgjidhet Presidenti i Ri i Republikës. Ndërsa janë konsumuar tre raundet e para, tanimë mazhoranca ka rrugën e lirë për të zgjedhë kreun e ri të shtetit me shumicë të thjeshtë votash.
Konferenca e Kryetarëve vendosi këtë të Martë që raundi i katërt për votimin e Presidentit të ri në parlament të mbahet pasditen e së Shtunës.
Deputetët e mazhorancës në mbledhje votuan propozimin e kreut të grupit parlamentar Taulant Balla, i cili kërkoi që seanca e raundit të katërt të mbahet të Shtunën, në ora 18:00.
Po ashtu, socialistët votuan propozimin e Ballës që afati i dorëzimit të kandidaturave në Kuvend të kryhet deri më 4 Qershor, ora 12:00 dhe po të njëjtën ditë, të mblidhet komisioni i ligjeve për këtë çështje, në ora 16:00.
Në komision pati debate mes palëve, me deputetët demokratë që akuzuan mazhorancën se po zgjedh e vetme Presidentin e ri, duke anashkaluar opozitën në këtë proces.
Në tre raundet e para, kur Presidenti zgjidhej me 84 vota, nuk pati dakordësi mes palëve për një kandidaturë konsensuale për kreun e ri të shtetit. Në raundi e katërt, mjaftojnë 71 vota për të zgjedhur pasardhësin e Ilir Metës. Vota, që mazhoranca e Ramës i ka e vetme.
