Digjet zyrtarisht raundi i tretë për zgjedhjen e Presidentit të Republikës. Tanimë, i hapet rruga mazhorancës ta zgjedhë Presidentin me shumicë të thjeshtë votash.
Këtë të Hënë, komisioni parlamentar i ligjeve konstatoi mungesën e kandidatëve për kreun e shtetit.
Drejtuesja e komisionit Klodilda Bushka theksoi se “edhe për këtë raund nuk janë depozituar kandidatë nga kolegët deputetë”.
“Kështu që ky raund do të konsiderohet i kryer sipas parashikimit Kushtetues dhe rregullores së Kuvendit”, shtoi ajo. Më tej, ja kaloi fjalën deputetit socialist Eduart Ndreca, i cili lexoi raportin ku ripërsëritej mungesa e kandidatëve depozituar në Kuvend për raundin e tretë.
Raporti u vota pro nga 13 ligjvënësit e mazhorancës prezentë në mbledhje, ndërsa Fatmir Mediu, i vetmi në komision nga opozita, nuk mori pjesë në votim.
Raporti iu paraqit dhe parlamentit, duke djegur kështu edhe raundin e tretë për zgjedhjen e Presidentit të Republikës.
Në tre raundet e para, sipas parashikimeve ligjore, Presidenti zgjidhet me shumicë të theksuar – 84 vota. Numra që mazhoranca e Ramës nuk i plotëson dot e vetme. Në këto kushte, për zgjedhjen e kreut të shtetit brenda tre raundeve të para do të duhej një marrëveshje me opozitën.
Nga njëra anë, Rama dhe Taulant Balla, kreu i grupit parlamentar socialist mohuan në mënyrë kategorike bisedimet me Komisionin e Rithemelimit.
Ata bën një marrëveshje paraprake për bashkëpunim me Alibeajn, por që zgjati disa orë. Alibeaj kërkonte që opozita të propozonte kandidatët për President dhe të arrihej dakordësia me mazhorancën për zgjedhjen e një prej tyre. Nga ana tjetër, Taulant Balla tha PS do të merrte propozimet, por nuk garantonte se një nga kandidatët e opozitës do të merrte dritën jeshile nga PS. Kjo deklaratë e Ballës një ditë pas marrëveshjes në komisionin e ligjeve kthehu palët në pozitat e mëparshme.
Kështu, pa gjetur gjuhën e përbashkët, tre raundet e parë u dogjën dhe tanimë, siç ishte parashikuar gjegjësisht që prej nisjes së procesit të zgjedhjes së kreut të ri të shtetit, Rama është gati të vendosë në Presidencë të zgjedhurin e tij.
Në raundin e katër, mjaftojnë vetëm 71 vota, ndërsa PS mori 74 mandate në zgjedhjet e fundit parlamentare.
