Dy persona të dyshuar si autorët e supergrabitjes së 3.2 milionë dollarëve janë identifikuar nga policia.
Pas identifikimit edhe të vendodhjes së tyre, një operacion i madh policor mësohet se ka nisur në Tiranë dhe rrethina për të kapur autorët e dyshuar.
Operacioni policor është duke u zhvilluar në zonën e Vorës dhe Prezës, ku policia dyshon se janë autorët e supergrabitjes. Në aksion janë duke marrë pjesë forca të shumta të RENEA-s, FNSH-së dhe Policisë së Tiranës.
Operacioni është duke u bërë njëkohësisht nga toka dhe ajri.
Supergrabitja ndodhi të enjten e kaluar në rrugën drejt Rinasit.
Po sot u mësua se vetëm një person, që ishte shoqëruar mbi ngjarjen, është ndaluar nga policia.
Raportohet se personi që ndodhej deri mbrëmë në ambientet e Drejtorisë së Policisë së Tiranës, shtetasi me iniciale F.Xh., nga Lushnja, është shoqëruar tri ditë më parë bashkë me të vëllain.
Ky i fundit u la i lirë, kurse F.Xh. vijon të qëndrojë në polici, për shkak se nuk ka argumentuar prezencën e tij pranë zonës ku ndodhi ngjarja, para, gjatë dhe pas grabitjes.
