Rreth 40 mijë anëtarë të PD pritet të zgjedhin sot përmes parimit “një anëtar, një votë” kryetarin e PD-së, ndërsa në garë janë Sali Berisha dhe Ibsen Elezi.
Në të gjithë vendin do të jenë funksionale 108 qendra votimi, të cilat hapen në orën 08:00 dhe mbyllen në orën 18:00.
I pari në fletën e votimit është vendosur ish-kryeministri Sali Berisha, kurse i dyti rivali i tij Ibsen Elezi.
Nëse në orën 18.00 do të ketë anëtarë të PD që ende nuk kanë votuar, Qendrat e Votimit nuk do të mbyllen derisa të ketë votuar edhe personi i fundit.
Anëtarët e Këshillit Kombëtar të PD do të votojnë në njërën prej dy qendrave të votimit në Selinë Qendrore të Partisë Demokratike, ose në degët ku ata janë të deleguar pasi të kenë njoftuar pranë Komisionit.
Në zgjedhjet e sotme që mbahen mes demokratëve të drejtuar nga Komisioni i Rithemelimit më e rëndësishme mbetet pjesëmarrja në procesin e votimit. Gjatë takimeve që ka mbajtur në qarqe të ndryshme të vendit, ish-Kryeministri Sali Berisha, i cili pritet të marrë sot drejtimin e PD, ka theksuar se jemi 44 mijë misionarë, duke iu referuar në këtë mënyrë anëtarëve të kësaj partie, që morën pjesë në Referendumin e 18 dhjetorit, datë ku u certifikuan edhe vendimet e Kuvendit të 11 dhjetorit 2021.
Zgjedhjet mbahen në një kohë kur në grupin parlamentar demokrat janë shfaqur 3 formacione, njëri që mbështet Rithemelimin, një tjetër që drejtohet nga Enkelejd Alibeaj dhe deputetët që ishin në krah të Lulzim Bashës, dhe një grupim i tretë, që shfaqet si më neutrali dhe që deri më tani nuk është përfshirë në asnjë nga dy grupimet e tjera.
