Nga Boldnews.al
Kompania “Fusha” është një nga kompanitë më të preferuara të Bashkisë së Tiranës, gjatë drejtimit nga Erion Veliaj. Ky i fundit i ka dhënë dhjetëra miliona euro kësaj kompanie, për rrugë, pastrime dhe ndërtime sheshesh. Padyshim që kontratat më të majme kanë qenë për ndërtimin e sheshit “Skënderbej”, ku megjithëse Bashkia hapi disa tendera, të gjithë u fituan nga kompania “Fusha”.
Madje, në fund, kjo firmë fitoi edhe tenderin e mirëmbajtjes. Por, pas akuzave të forta për lidhje të ngushtë mes pronarëve dhe Veliajt, sidomos pas shembjes së Teatrit Kombëtar, ku u tha se në truallin ku ndodhej godina, dhe në hapësirën pas saj do të ndërtonte pikërisht kjo firmë në një sipërfaqe prej disa mijë metrash katror, “Fusha” u largua disi nga Tirana duke gjetur “strehë” në Bashki të tjera, kryesisht në Vlorë, ku fitoi tendera nga Fondi Shqiptar i Zhvillimit.
Por, fitoi edhe tendera të tjerë po në jug, me kontrata të dyshimta me ARRSH-në apo pushtetin lokal. Dhe, pas “sorollatjes” në rrethe, firma “Fusha” rikthehet të fitojë një tjetër tender nga Bashkia e Tiranës, kësaj here për shkurre!
Sipas dokumenteve që disponon Boldnews.al, Bashkia e Tiranës, nëpërmjet Drejtorisë së Përgjithshme të Pastrimit dhe Gjelbërimit, ka finalizuar tenderin me objekt “furnizim, vendosje drurë-shkurre dekorative”. Fondi limit i këtij tenderi ishte 37.821.095 pa TVSH.
“Ju informojmë se, në këtë procedurë kanë marrë pjesë ofertues si më poshtë vijon me këto vlera përkatëse të ofruara: AlbGarden me vlerë 35 000 000 lekë pa TVSH, DEAN 09 shpk me vlerë 37.763.650 lekë dhe fusha FUSHA shpk me vlerë 35.996.500 lekë, pa TVSH ose 43.195.800 lekë me TVSH.
Ndërkohë, dokumenti vijonte shpjegimin se përse u skualifikua oferta më e ulët, duke përsëritur e përsëritur të njëjta skema si me tenderat e tjerë të fituar nga “Fusha”. Në këtë rast, firma fituese merr maksimumin e vlerës së ofruar nga Bashkia e Tiranës.
Në dokumente shkruhet se arsyet e skyalifikimit janë për shkak se “në formularin e vetë-deklarimit tek paragrafi përkatës mungojnë kokoret dhe kompletet e ndihmës së shpejtë”.
“Sqarojmë se fatura për kokore nuk përmban barcode i cili të vërtetojë fiskalizimin e saj, në të kundërt të faturës për komplete të ndihmës së shpejtë e cila e përmban barcodin. Faturat janë paraqitur në një dokument të vetëm, pavaresisht se blerja e pretenduar është kryer në dy entitete biznesi të ndryshme” thuhet në këto dokumente.
Më tej vijon se asnjë nga faturat nuk vërteton se ky mall (kokore dhe komplete të ndihmës së shpejtë) janë blerë nga OE ALBGARDEN sh.p.k, pasi jo vetëm që OE nuk e ka deklaruar në formularin e vetë-deklarimit por edhe sepse faturat nuk vërtetojnë dorëzimin e mallit, për shkak të datës së pagesës disa ditë më pas në rastin e faturës së kompleteve të ndihmës së shpejtë, apo për shkak të mungesës së barcode në rastin e kokoreve.
Por, çfarë shkurresh do vendosë? Ato të mbjella po nga vetë kjo firmë kur bëri sheshin “Skëndërbej”, apo do të mbulojë “gabimet”, përfshi edhe mosvendosjen e shkurreve në atë rast?
Dhe, për këto shkurre, taksapaguesit e Tiranës do t’i paguajnë firmës “Fusha” edhe 400 mijë USD.
