Një operacion i madh është zhvilluar sot nga ana e SPAK në disa qytete të vendit.
Operacioni është shtrirë në qytete të tilla si Tirana, Durrësi dhe Elbasani.
Në pranga kanë përfunduar 10 persona në Elbasan. Urdhër-arrestet janë lëshuar për anëtarët e një grupi të dyshuar kriminal.
Ky grup është mjaft i fuqishëm, dyshuar për vepra të rënda e ngjarje të bujshme që kanë ndodhur së fundmi në vendin tonë.
Akuzat që ka ngritur SPAK janë vrasje, shantazh e rrëmbim. Paraprakisht dyshohet se urdhër arrestet janë lëshuar pasi i penduari i drejtësisë Nuredin Dumani, ka treguar bashkëpunëtorët dhe urdhëruesit e disa ngjarjeve kriminale të ndodhura kryesisht në qytetin e Elbasanit.
Dumani u arrestua pak javë më parë në qytetin e Fierit, në një aksion të policisë së shtetit, pasi i shpëtoi një përplasje me armë në rrethrrotullimin e Bradasheshit në Elbasan.
Ai dyshohet se u përball me armë me Talo Çelën, një prej 5 personave më të kërkuar aktualisht në vendin tonë, pjesë e grabitjes së Rinas, dhe i dyshuar për disa vrasje që pasuan në vitet e fundit.
