Vllaznia është në garë për një vend në zonën europiane, teksa luan me Egnatian të shtunë në 17:00 në “Loro Boriçi”. Tre pikë larg Partizanit të vendit të tretë, shkodranët kanë mundësi të arrijnë objektivin edhe nga Kupa, aty ku luajnë në finale me Laçin.
Veç anës sportive, tanimë drejtuesit në Shkodër janë duke menduar edhe për lojtarët e afruar apo larguar në merkato. Fakt është se te Vllaznia do rikthehet në ekip Kaina Nunes, sulmuesi 24 vjeçar që këtë edicion u bashkua me shkodranët por u huazua në janar te Kastrioti.
Shtatë golat e tij me krutanët kanë bindur drejtuesit për t’i dhënë një mundësi brazilianit për të treguar aftësitë e tij edhe njëherë në “Loro Boriçi”.
