Ish-Kryeministri Sali Berisha, në një takim me demokratët e Durrësit, në kuadrin e fushatës për zgjedhjen e kreut të PD, proces që do të mbahet me 22 maj, u shpreh se demokratët bënë një udhëtim unik në historinë e Europës, pavarësisht pengesave që patëm.
Berisha tha se ndërmorrëm këtë udhëtim për të ngritur në këmbë forcën tonë politike, që kalonte nga disfata në disfatë.
Ish-Kryeministri deklaroi se askush nuk e besonte se ne do të kishim mbi 40 mijë anëtarë, të cilët janë një ushtri misionerësh, që kanë një autoritet të lartë moral, të cilët përballuan çdo trysni të pandershme, që u ushtrua mbi ju.
“Jam dëshmitar i trysnive, shantazheve dhe presioneve edhe nga një klientelë private, që është shndërruar në një segment të mafies shtetërore, sikundër patëm presionet edhe nga mafia e George Soros”, tha Berisha.
Ai u shpreh se në udhëtimin që nisëm rikthyem vlerat më të mira, ndërsa kjo lëvizje është revolucion që nuk do të ndalet.
“Establishmeti po dridhet, mjaft është mjaft. Ne u ngritëm si opozitë e vërtetë. SPAK është bërë më i frikshëm se Komiteti Qendror, pra ne arritëm por në këtë stacion ku jemi, një mision i madh tjetër na pret”, tha Berisha.
