Kuvendi i Shqipërisë ka dështuar të zgjedhë Presidentin e ri në raundin e parë të votimit, nga 5 të mundshmet që parashikon Kushtetuta.
Seanca plenare e 16 majit, e cila filloi në orën 17:00 ka zgjatur pak minuta, ndërsa raundi u konsiderua i ezauruar sipas Kushtetutës.
Nënkryetari i LSI-së, Petrit Vasili në një deklaratë për mediet u shpreh se e gjithë farsa që u luajt këto muaj nuk ishte për zgjedhjen e Presidentit, por për të mbuluar aferat.
Sipas tij, Rama nuk ka seriozitet dhe nuk është shtetar, por qëllimi i tij është të rrëmbejë institucionin e kreut të shtetit.
“Risia e Edi Ramës abortoi. E gjithë farsa, komedia e zezë që u luajt këto 2-3 muaj nuk kishte qëllim të krijonte një proces me risi për zgjedhjen e presidentit por zhurmë për të hequr vëmendjen nga aferat. Me gjithë daullet e çara të çingijeve të Rilindjes, patë më në fund që procesi i dhjetëra zarfeve ishte një abort total. Sot gjithë shqiptarët prisnin pas këtyre daulleve, jo ne, por aborti qe i plotë dhe besoj se asnjë shqiptar nuk mund ta imagjinonte që të paktën për sy e faqe të mos kishim qoftë edhe një kandidat, qoftë dhe një kloun sa për ta paraqitur sot në sallën e parlamentit, e gjitha qe një fiasko e vërtetë, një faqe e zezë e vërtetë.
Duhet shënuar në rekorde kjo farsë. Rama nuk ka seriozitet dhe nuk është shtetar. Ka atë qëllim të vjetër, etje të pashuar për të rrëmbyer institucionin e Kreut të Shtetit. Me 71 vota sa ka do zgjedhë rripin e tij të mesit për ta çuar në Presidencë. Akti i parë u luajt dhe komedia u luajt sot me 5 sekonda”, tha Vasili.
