Nga Boldnews.al
Reforma në Drejtësi synonte të largonte nga sistemi gjyqtarët e prokurorët e korruptuar dhe të paaftë dhe ata që konsideroheshin si “të Plepave”, e të zhvillohej e të përparonte me magjistratë të rinj, të shkolluar në Shkollën e Magjistraturës.
Por, ky qëllim madhor u korruptua politikisht gjatë rrugës së zbatimit të Vetingut. Tashmë, pjesa më e madhe e gjyqtarëve dhe prokurorëve të shkarkuar në procesin e rivlerësimit janë pikërisht produkt i Shkollës së Magjistraturës.
Ndërkohë, në sistem vijojnë të ushtrojnë funksionet “mbetjet” e periudhës së komunizmit. Madje, ata nuk lejohen që të largohen nga sistemi, edhe kur mbushin moshën e pensionit.
Simboli është Ardian Dvorani, një hetues i periudhës së komunizmit, që vijon të jetë fuqishëm në sistemin gjyqësor, me mbështetjen absolute të kryeministrit Edi Rama, por edhe i shpallur “Kalorës i Anti-korrupsionit” nga një vendim i çuditshëm i Departamentit Amerikan të Shtetit.
Megjithatë, Dvorani nuk është i vetmi që “lundron” në ujërat e “Drejtësisë së Re”.
Këshilli i Lartë i Prokurorisë merr në shqyrtim këtë të Hënë kërkesën e prokurorit Kujtim Luli, për zgjatjen e kohës së qëndrimit në detyrë, pas mbushjes së moshës së pensionit.
Në rendin e ditës së mbledhjes së KLP-së për datën 9 Maj 2022 është përfshirë edhe pika: “Diskutimi/ miratimi i projekt – aktit për miratimin e qëndrimit në detyrë të zotit Kujtim Luli”.
Kujtim Luli, aktualisht prokuror pranë Prokurorisë së Përgjithshme, ka nisur aktivitetin profesional si hetues në vitin 1986.
Dëshmitarë të gjallë kanë treguar publikisht se Kujtim Luli ka qenë në një zyrë me një tjetër hetues të komunizmit, “babain e Reformës në Drejtësi”, Fatmir Xhafajn, aktualisht deputeti i Partisë Socialiste.
Një qytetare nga Kruja, Valbona Duka, ka deklaruar publikisht në një emision mediatik se Fatmir Xhafaj dhe Kujtim Luli e kanë dhunuar fizikisht, pasi mendonin se ajo dhe vëllai i saj kishin menduar të arratiseshin.
“Më morën më çuan në polici dhe Fatmir Xhafa më futi në zyrë së bashku me Kujtim Lulin më rrahën dhe më thanë se vëllai jot na tha që ti do arratiseshe. Unë nuk dija gjë isha gocë e re, ai më binte me shpulla surratit. Familjen e kisha të internuar, një motër një vëlla të vogël e kisha”, u shpreh ndër të tjera Valbona Duka, e cila jeton prej shumë vitesh në Gjermani.
Kujtim Luli e kaloi pa asnjë problem procesin e Vetingut, megjithë pikëpyetjet e mëdha që u ngritën mbi pasurinë dhe sidomos integritetin e tij dhe personave të afërt me të.
Bashkëshortja e tij, Fatmira Luli, gjithashtu një ish-gjyqtare në periudhën e komunizmit, aktualisht është anëtare e Këshillit të Lartë Gjyqësor dhe merr pjesë në ‘orientimin” e sistemit të drejtësisë drejt Bashkimit Europian.
Është e paqartë se çfarë mund t’i japë ende sistemit të drejtësisë një prokuror i komunizmit. Por, megjithatë, Këshilli i Lartë i Prokurorisë ka vendosur ta mbajë në sistem edhe për disa vite të tjera, megjithëse ka mbushur moshën për pension dhe duhej të “zhdukej” nga skena institucionale, për të shuar sadopak shpirtrat e trazuar të viktimave të komunizmit.
