Shqiptari Ermal Meta u cilësua si supriza e edicionit të këtij viti të festivalit italian të këngës “Sanremo”. Ermal Meta u rendit i treti në festivalin e “Sanremos 2017” me këngën me nota autobiografike “Vietato Morire”, një apel kundër dhunës ndaj gruas dhe kundër dhunës në familje.
Këngëtari me origjinë shqiptare, i cili vitin e kaluar ishte në garë në mes të propozimeve të reja, pas fitores në mbrëmjen “cover”, Ermal Meta mbrëmë në finale mori një tjetër çmim prestigjioz. Kënga e tij “Vietato Morire” fitoi Çmimin e Kritikës “Mia Martini Sezione Campioni”.
Meta mori 37 vota, duke lënë pas Fiorella Mannoia-n me 32 preferenca dhe Paola Turci-n me 15.
Për këtë trofe votuan 115 gazetarë të akredituar në sallën e shtypit të “Ariston Roof”. 113 vota ishin të vlefshme, kurse 2 fletë votimi u cilësuan të dëmtuara.
Kantautori Francesco Gabbani fitoi “Festivalin e Sanremos 2017” me këngën “Occidentali’s Karma”.
Fiorella Mannoia u rendit e dyta me këngën “Che sia Benedetta”. Ajo fitoi edhe trofeun “Lucio Dalla”.
Përgatiti: BoldNews
