Gjyqi i bujshëm mes Johnny Depp dhe Amber Heard ka vazhduar me ditën e 11-të. Teksa ishte radha e ekipit të aktorit, Malcolm Connolly, truproja personal i personazhit të “Jack Sparrow”, ndërhyri përmes një videoje në ‘Zoom’.
Connolly tregoi gjithçka që përjetoi gjatë martesës mes Johnny Depp dhe Amber Heard, madje duke ofruar materiale për të mbështetur fjalët e tij. Ai tha se Johnny Depp “nuk ishte i lumtur” në martesën e tij me Amber Heard.
Përveç kësaj, Malcolm Connolly deklaroi se Heard ishte e mirë në fillim, por me kalimin e kohës, qëndrimi i saj ndryshoi plotësisht: “Amber filloi të ndryshonte. Ajo u bë e fortë, kërkuese… ajo mund të ftohej sa hap e mbyll sytë”.
Truproja tregoi fotografi që përforconin edhe më shumë deklaratat e tij. Truproja tha se ata ishin në muajin e mjaltit kur kishin ndodhur disa incidente, si dëmtimet në fytyrë.
“Shumica e këtyre shenjave ishin në anën e majtë të fytyrës së tij. Ai kishte buzë të fryra dhe mavijosje në sy. Ai ka goditur një derë … ose një derë e ka goditur atë”, tha Connolly, i cili di të identifikojë çdo dëmtim.
Truproja nuk ka parë kurrë ndonjë debat mes çiftit, por ka qenë dëshmitar i britmave të saj.
