Pas vendimit të ARRSH-së për devijimin e rrugës nacionale drejt ‘Aeroportit të Rinasit’, ka reaguar kryebashkiaku i Shkodrës Bardh Spahia duke thënë se do i ‘kushtojë shtrenjtë’ zonës së Veriut.
Përmes një postimi në Facebook, Spahia thekson se udhëtimi i shkodranëve dhe zonave të veriut drejt kryeqytetit do të zgjatet në kilometra, gjë që përkthehet me kosto më të lartë financiare.
Ai u bëri thirrje institucioneve përkatëse për rishikimin e këtij vendimi, të cilin e quan absurd.
POSTIMI I PLOTË:
Jam njohur me vendimin e fundit të ARRSH për devijimin e rrugës nacionale drejt aeroportit “Nënë Tereza” në Tiranë në drejtimin nga Shkodra drejt kryeqytetit. Me shumë të drejtë, ka patur reagime të shumta të banorëve të Shkodrës lidhur me këtë vendim që dëmton Veriun e vendit.
Është një vendim i pa menduar mirë, që shkakton jo vetëm zgjatje të udhëtimit në kilometra por edhe shtim të kostos financiare për banorët nga Shkodra dhe zonat e Veriut drejt aeroportit “Nënë Tereza” dhe kryeqytetit.
Në emër të banorëve të Shkodrës, i bëj thirrje institucioneve që të rishikojnë këtë vendim absurd të marrë në dëm të banorëve të Shkodrës dhe mbarë Veriut të vendit.
Nga ana tjetër, ftoj të gjithë kolegët, drejtues të bashkive të tjera në Veri të vendit që t’i bashkohen kësaj thirrje në të mirë të qytetarëve, të cilët sot kanë nevojë për lehtësim dhe jo vështirësim të lëvizjes dhe rritje të kostove të jetesës.
