Gjykata e Lartë konfirmon marrjen e ankimit të ish-ministrit të Brendshëm Saimir Tahiri, i cili kërkon pezullimin e dënimit me burg.
“Komunikohet në mënyrë të përmbledhur se, më datë 26.04.2022, në Gjykatën e Posaçme të Apelit për Korrupsionin dhe Krimin e Organizuar, u depozitua dhe u regjistrua rekursi nr. 79, datë 26.04.2022, paraqitur nga i pandehuri S.T., ndaj vendimit nr. 03, datë 04.02.2022 të Gjykatës së Posaçme të Apelit për Korrupsionin dhe Krimin e Organizuar, me të cilin u deklaruan fajtorë të pandehurit S.T. dhe J.Ç. për veprat penale të parashikuara nga nenet 283/a/1, 28/4, 333/a/2 dhe 334/1 të Kodit Penal”, thuhet në një njoftim të gjykatës.
Tahiri, i dënuar me 3 vjet e 4 muaj për shpërdorim detyre nga Apeli i Gjykatës së Posaçme, kërkon lirimin nga qelia me pretendimin se i rrezikohet jeta në burgun e Fierit.
“Vendimi i Gjykatës së Posaçme të Apelit është vënë në ekzekutim menjëherë në kundërshtim me kërkesat e ligjit dhe në shkelje të të drejtave dhe lirive themelore të shtetasit Saimir Tahiri, pa respektuar procedurën ligjore. Duke parashtruar se në rastin konkret vuajtja e menjëhershme e dënimit me burgim e të pandehurit Saimir Tahiri, mund të sjellë pasoja të rënda për vetë të pandehurin si dhe për familjen e tij. Kështu, Z.Tahiri ka mbajtur funksionin e ish Ministrit të Brendshëm të Republikës së Shqipërisë ai rrezikon dhe mund të bëhet objekt i personazheve të krimit që ndodhen duke kryer dënimin në IEVP Fier”, thuhet në kërkesën e ish-ministrit drejtuar gjykatës.
“Nga ana tjetër edhe familja e tij gjendet e ekspozuar ndaj pasoja të mundshme”, thuhet më tej në rekurs.
E teksa Tahiri kërkon lirimin nga qelia, në një tjetër kërkesë drejtuar Gjykatës së Lartë, prokuroria kërkon dënimin e ish-ministrit edhe për trafik droge.
