Periudha e pranverës ka brenda edhe ditët me diell, por edhe ato me vranësira dhe shi. Java parashikohet kryesisht e paqëndrueshme, por nuk do të mungojnë edhe orët apo ditët me diell.
Java nis me ditën e Hënë dhe mot me alternime kthjellimesh e vranësirash deri të dendura. Reshje shiu me intensitet të ulët priten kryesisht në relievet kodrinore-malore dhe zonën e jugperëndimit.
Për ditën e Martë, moti parashikohet kryesisht me diell (kthjellime) si dhe alternime vranësirash hera-herës deri të dendura në mesditë. Në pjesën e parë të ditës, reshje shiu të dobëta e shtrëngata lokale parashikohen në zonën e qendrës dhe jug.
Dita e Mërkurë parashikohet me mot të vranët e reshje shiu me intensitet të ulët dhe kryesisht mesatar në formën e shtrëngatave. Në zonën e veriut, në pjesën e parë të ditës priten reshjet me intensitet deri të lartë në formën e rrebesheve dhe stuhive. Në zonën e Alpeve dhe verilindje priten reshje dëbore me intensitet të ulët dhe mesatar.
Dita e Enjte parashikohet me mot kryesisht të kthjellët e vranësira kalimtare. Java mbyllet me ditën e Premte e cila nis fillimisht me mot të kthjellët e shtim vranësirash prej orëve të mesditës. Në momentin e shtimit të vranësirave parashikohen reshje shiu të dobëta e shtrëngata afatshkurtra në një pjesë të madhe të vendit.
