Presidenti Ilir Meta, gjatë një konference për gazetarët, u pyet lidhur me kërkesën e Ramës drejtuar SPAK-ut për hetimin e Sali Berishës pas sanksioneve nga SHBA.
Meta tha se kjo është përpjekje e dëshpëruar për të shmangur përgjegjësinë nga kapja e shtetit.
“S’kam dëshirë të merrem me çështje të cilat unë i konsideroj banale dhe të cilat tregojnë një raport shumë të vjetër midis politikës dhe drejtësisë aq më tepër kur vijnë nga ajo lloj politike që do sillte drejtësinë e re. Mendoj se çdo politikan kur ka fakte, akte, vepra kornete i çon në institucionet e drejtësisë dhe ju e dini se unë si president kam çuar bazuar në akte, fakte, prova, për njerëz të caktuar dhe këtë duhet të bëjë çdo politikan serioz. Përpjeka për ti dhënë udhëzime institucioneve të drejtësisë se deri ku e ka kufirin për të hetuar është përpjekje e dëshpëruar për të shmangur përgjegjësinë nga kapja e shtetit dhe është detyra e institucioneve të drejtësisë të tregojnë integritetin dhe besueshmërinë e tyre. Dhe detyra e qytetarëve të marrin përgjegjësitë e tyre, duke kërkuar përgjegjshmëri ndaj atyre që e kanë dështuar këtë reformë dhe kanë ndikuar në përkeqësimin e jetës së qytetarëve shqiptarë”, tha Meta.
