Një agjent qëllon dhe vret një afrikano-amerikan, ndërsa ishte shtrirë në tokë. Publikimi i një videoje të re nga momenti tronditës ka ndezur debatin për përdorimin e tepruar të forcës nga policia.
Ngjarja ka ndodhur më 4 prill në Grand Rapids, Michigan, por policia publikoi pamjet vetëm dje, 13 prill.
Pamjet e marra nga disa kamera tregojnë 26-vjeçarin Patrick Loyola në tokë dhe një polic të bardhë që i ka vendosur këmbët mbi shpinë. Të dy po përplasen për taserin (pistoletën elektrike) të nxjerrë nga agjenti.
“Lëreni atë”, dëgjohet duke bërtitur polici. “Lëre taserin”, përsërit agjenti përpara se të nxjerrë armën dhe ta godasë në kokë 26-vjeçarin. Djali ishte ndaluar për një kontroll në rrugë. “Oficeri qëlloi gjatë përleshjes. Ai do të trajtohet si kushdo tjetër,” tha shefi i policisë Eric Uinstrom pa bërë të ditur emrin e agjentit. “Nëse ai akuzohet, ne do ta zbulojmë emrin”, shton ai.
Transmetimit të videos i ka paraprirë një demonstratë para komisariatit. Qindra njerëz dolën në rrugë për të kërkuar drejtësi për Loyola duke thirrur “Jetët e zezakëve kanë rëndësi” dhe “Pa drejtësi nuk ka paqe”.
Ditët e fundit Uinstorm u takua me familjen e Loyolës, e cila u shpërngul në Shtetet e Bashkuara nga Kongo në vitin 2014. “Përballë pamjeve tronditëse, të cilat iu shfaqën para se t’i bënte publike, babai i Loyola-s ishte ngrirë, “gati u shua” përpara djalit të tij “i shtrirë në tokë me një oficer sipër tij që i nxori armën dhe e qëlloi në kokë”, tha pastori Israel Siku, i cili shoqëroi në polici babanë e djalit.
“Ishte një ekzekutim”, ka komentuar familja. “Edhe një herë na kujtohet se sa shpejt ndërveprimi me policinë mund të jetë fatal për një afrikano-amerikan në Shtetet e Bashkuara,” thotë avokati i të drejtave civile Benjamin Crump, i cili trajtoi edhe çështjen e George Floyd, fytyra e lëvizjes “Black Lives Matter”.
