Kryeministri Edi Rama kërkoi këtë të Shtunë nga Kongresi i PS-së hetimin e Sali Berishës nga Prokuroria e Posaçme.
Rama tha se SPAK duhet të sqarojë nëse qëndrojnë akuzat e ngritura nga Sekretari Amerikan i Shtetit Blinken, me firmën e të cilit Berisha u shpall “non grata” nga SHBA.
“SPAK-u në këtë rast ka një detyrim që e ndalon shtetasin familjarisht të hyjë në SHBA. Se ajo deklaratë s’mund të rrijë pezull, ose ka bazë ose s’ka bazë. Por këtë s’mund ta thotë politika e brendshme, duhet ta thotë vetëm drejtësia. Se ajo deklaratë e mbetur pa përgjigje të drejtësisë për të gjitha ata që kuptojnë dy gramë nga marrëdhëniet ndërkombëtare dhe një gramë nga pesha e marrëdhënieve mes SHBA dhe Shqipërisë, është gur në qafën e Shqipërisë dhe SPAK duhet t’ja heqi Shqipërisë këtë gurë nga qafa. Duke e ndarë: ka bazë, s’ka bazë”, tha Rama.
Më herët, Rama tha se PD “duhet të kishte shkuar në djall shumë kohë më parë”.
“Ajo forcë duhet të kishte shkuar në djall shumë kohë më parë, shumë kohë më parë që Shqipëria të kishte një opozitë serioze. E për sa kohë ajo forcë vijon të jetë aty, Shqipëria nuk ka për të pasur një force opozitë serioze. Prandaj ne duhet të jemi shumë të shqetësuar jo na mungon opozita andej, por sepse nuk duhet të biem në kurthin e atij që s’është i motivuar të luftojë. Prandaj forcën tonë duhet ta masim me fuqinë që kemi për ti bashkuar qytetarët shqiptarë, është shumë më e vështirë se të kesh opozitën, atë opozitë që të pakën kemi pas, përmes një politike që është politika e jetës së tyre reale… “, u shpreh Rama.
